հինգշաբթի, 3 մայիսի 2001
Այսօր տեղի ունեցավ ՀՀ կառավարության հերթական նիստը, որը վարում էր վարչապետ Անդրանիկ Մարգարյանը:
Մինչև օրակարգին անցնելը, վարչապետն անդրադարձավ կառավարության գործունեության ծրագրի կատարումն ապահովող միջոցառումների կատարողականին: Նշելով, որ անցած 4 ամսվա համար նախատեսված 164 միջոցառումներից 20-ը չի կատարվել, վարչապետը վերջին նախազգուշացումն արեց մի շարք նախարարների և գերատեսչությունների ղեկավարների: Կարևորելով ժամկետների խստագույն պահպանումը, վարչապետը նշեց, որ ժամանակացույցի հետագա անհարգելի խախտումների դեպքում կձեռնարկվեն համապատասխան քայլեր:
Կառավարությունը հավանություն տվեց ՀՀ ինֆորմացիոն /տեղեկատվական/ տեխնոլոգիաների արդյունաբերության զարգացման հայեցակարգին, որով տրվում են ոլորտի զարգացման ռազմավարությունը, նպատակները, խնդիրները, ենթակառուցվածքի և սերտիֆիկացման համակարգի կատարելագործումը, օրենսդրական դաշտի բարելավումը:
ՀՀ արդյունաբերության և առևտրի նախարարությանը հանձնարարվեց շահագրգիռ նախարարությունների, գերատեսչությունների և կազմակերպությունների մասնակցությամբ՝ հայեցակարգից բխող խնդիրների իրականացման նպատակով մշակել համապատասխան միջոցառումների ժամանակացույց, անհրաժեշտության դեպքում առաջարկներ ներկայացնել կառավարություն:
Նիստում հաստատվեց բնակավայրերի տարածքների գոտևորման նախագծերի մշակման, փորձաքննության, համաձայնեցման, հաստատման և փոփոխման կարգը:
Մեկ այլ որոշմամբ հավանություն տրվեց քրեակատարողական համակարգի բարեփոխումների ծրագրին: Վերջինիս նպատակների թվում, մասնավորապես, նշվում է ՀՀ ներքին գործերի նախարարության քրեական պատիժների իրականացման համակարգի վերակազմակերպումը ՀՀ արդարադատության նախարարության քրեակատարողական ծառայության, ինչպես նաև իրավական ու առկա նյութատեխնիկական բազայի հիման վրա բարեփոխումների իրականացումը:
Կառավարությունը որոշակի փոփոխություններով հաստատեց ՀՀ պետական բարձրագույն ուսումնական հաստատությունների 2001/2002 ուստարվա անվճար և վճարովի ուսուցման տեղերը՝ ըստ ուսումնական հաստատությունների ու մասնագիտությունների: Փոփոխություններ կատարելու առումով վարչապետը կարևորեց որոշակի մասնագիտությունների կենրոնացումը համապատասխան մասնագիտացված ԲՈՒՀ-երում, ինչպես նաև պետական պատվերի օպտիմալացումը՝ հաշվի առնելով իրական պահանջարկը:
Հաստատվեցին նաև 2001/2002 ուսումնական տարվա մագիստրատուրայի ընդունելության տեղերի թիվը և ասպիրանտուրայի ու դոկտորանտուրայի ընդունելության պետական պատվերը: Ասպիրանտուրայի համար սահմանվec 369, իսկ դոկտորանտուրայի համար՝ 11 տեղ:
ործադիրը հավանություն տվեց ջրային տնտեսության համակարգի ընկերությունների գործունեության և կառավարման բարելավման 2001-2005թթ. ֆինանսական հոսքերի և դրանց իրականացման միջոցառումների ծրագրին: Որոշմամբ սահմանվում է, որ ՀՀ բոլոր տեսակի ջրային պաշարների, բացի Երևան քաղաքը սնող ջրաղբյուրների, առևտրային օգտագործման պետական կառավարման իրավասությունը վերապահվում է կառավարությանն առընթեր ջրային տնտեսության պետական կոմիտեին՝ կառավարության կամ նրա լիազորած մարմնի կողմից սահմանված քվոտաների և կանոնների հիման վրա: Նշվում է նաև, որ խմելու, ոռոգման և այլ նպատակով օգտագործված ջրերը ենթակա են պետական հաշվառման, և վճարը կատարվում է տվյալ գոտու համար կառավարության կողմից հաստատված սակագնով:
Ջրամատակարարման և ջրահեռացման օբյեկտների շինարարության պատվիրատուի գործառույթներն արդյունավետ իրականացնելու նպատակով և հաշվի առնելով միջազգային ֆինանսական կազմակերպությունների միջոցների ներգրավման հնարավորությունները, կառավարությունը որոշեց լուծարել «Շինարարության պատվիրատու» և «Ինվեստիցիոն ծրագրերի գործակալություն» ՊՓԲ-երը, միաժամանակ ստեղծվեց ջրային տնտեսության պետական կոմիտեի ենթակայության «Ջրամատակարարման և ջրահեռացման համակարգերի ծրագրերի իրականացում» պետական հիմնարկ:
ՀՀ էլեկտրաէներգիա բաշխող ընկերությունների մասնավորեցման հետագա աշխատանքները կազմակերպելու նպատակով կառավարությունը հաստատեց մրցութային հանձնաժողովի նոր կազմ՝ վարչապետ Անդրանիկ Մարգարյանի նախագահությամբ: Հանձնաժողովի անդամների թիվը նախկին 16-ից դարձել է 19-ը, կազմում ընդգրկվածների թվում են ՀՀ ԱԺ յուրաքանչյուր խմբակցության և խմբի մեկական պատվիրակ, ինչպես նաև ՀՀ արհեստակցական միությունների կոնֆեդերացիայի ներկայացուցիչը:
ՀՀ էներգետիկայի, ֆինանսների և էկոնոմիկայի, արդարադատության նախարարություններին հանձնարարվեց երկշաբաթյա ժամկետում մշակել և հանձնաժողովի քննարկմանը ներկայացնել միջոցառումների ծրագիր՝ ուղղված էլեկտրաէներգիա բաշխող ընկերությունների մասնավորեցման մրցութային փաստաթղթերի և կատարված աշխատանքների վերլուծությանը: Հանձնաժողովին հանձնարարվեց երկշաբաթյա ժամկետում կառավարություն ներկայացնել նշված ընկերությունների մասնավորեցմանն ուղղված աշխատանքների նոր ժամանակացույց:
Մեկ այլ որոշմամբ, Կարեն Դեմիրճյանի թանգարանի զբաղեցրած տարածքի վերակառուցման ու կահավորման համար կառավարության պահուստային ֆոնդից հատկացվեց 37 մլն 352 հազար դրամ:
