ուրբաթ, 13 մայիսի 2005
ՀՀ վարչապետ Անդրանիկ Մարգարյանն այսօր ընդունել է Հայաստանում ՄԱԿ-ի Զարգացման ծրագրի մշտական ներկայացուցիչ, ՄԱԿ-ի համակարգող Լիզ Գրանդեին՝ պաշտոնավարության ժամկետի ավարտի կապակցությամբ:
Բարձր գնահատելով տիկին Գրանդեի գործունեությունը մեր երկրում, վարչապետը նշել է, որ նրա պաշտոնավարման շրջանում ևս ՄԱԿ-ի շրջանակներում ծավալվող աշխատանքներին Հայաստանի մասնակցության ապահովման ուղղությամբ համագործակցությունը եղել է արգասավոր ու արդյունավետ:
Կառավարության ղեկավարը շնորհակալություն է հայտնել Լիզ Գրանդեին՝ իր ղեկավարած գրասենյակի կողմից ՀՀ կառավարությանը ցուցաբերած աջակցության, Աղքատության հաղթահարման ծրագրի մշակմանը շահագրգիռ մասնակցության, հասարկական կազմակերպությունների հետ ակտիվ և արդյունավետ աշխատանքի համար:
Հայաստանում ՄԱԿ-ի զարգացման մշտական ներկայացուցիչը մեծ փորձառություն է համարել մեր երկրում իր աշխատանքը, նշելով, որ այն անկասկած կօգնի իրեն հետագա աշխատանքում ևս: Տիկին Գրանդեն ընդգծել է, որ Հայաստանում իր պաշտոնավարման սկզբնական շրջանի համեմատ, այժմ զգալի դրական տեղաշարժ կա. կառավարությունը բավականին աշխատանք է իրականացրել և տնտեսության մեջ, և տարբեր ոլորտների բարեփոխումների առումով: Նա շնորհակալություն է հայտնել վարչապետին՝ ՄԱԿ-ի հետ համագործակցության հուշագիր ստորագրելու և իր ներկայացրած կազմակերպության նկատմամբ ցուցաբերած վստահության համար:
Հանդիպման ավարտին Անդրանիկ Մարգարյանը հաջողություններ է մաղթել Լիզ Գրանդեին՝ հույս հայտնելով, որ նա հետագա աշխատանքում ևս նույնպիսի հաջողությամբ և արդյունավետությամբ կաշխատի, ինչպես Հայաստանում:
