չորեքշաբթի, 18 մայիսի 2005
ՀՀ վարչապետ Անդրանիկ Մարգարյանն այսօր այցելել է Երևանի քաղաքապետարան, ծանոթացել նոր շենքային պայմաններում աշխատանքի ընթացքին: Վարչապետը շրջել է նաև Երևանի պատմության թանգարանի ցուցասրահներով, ծանոթացել մայրաքաղաքի հին ու նոր պատմությունը ներկայացնող գեղանկարչական, հնագիտական, ազգագրական ցուցանմուշներին: Քաղաքապետ Երվանդ Զախարյանը՝ ներկայացնելով կատարված և կատարվելիք աշխատանքները, շնորհակալություն է հայտնել այդ ամենի իրականացմանը կառավարության և վարչապետի ցուցաբերած աջակցության համար: Անդրանիկ Մարգարյանը հավաստել է, որ կառավարության կողմից հնարավոր աջակցությունը այսուհետ ևս կշարունակվի: Մասնավորապես, նա կարևորել է Երևանի պատմության թանգարանի՝ պատմամշակութային մեծ արժեք ներկայացնող ցուցանմուշների ոչ միայն ցուցադրությունը, այլև սերունդների համար դրանց պահպանությունը անհրաժեշտ մակարդակով կազմակերպելու խնդիրը:
