ուրբաթ, 20 մայիսի 2005
Այսօր կառավարությունում տեղի է ունեցել ՀՀ վարչապետին կից կանանց խորհրդի նիստ: Խորհրդի անդամներին տեղեկատվություն է ներկայացվել 2005թ. փետրվարի 26-ից մինչև մարտի 12-ը Նյու Յորքում կայացած ՄԱԿ-ի կանանց կարգավիճակի հանձնաժողովի 49-րդ նստաշրջանի աշխատանքների և այդ աշխատանքներին Հայաստանի պատվիրակության մասնակցության վերաբերյալ:
Նստաշրջանը, որին նախորդել էր նախապատրաստական միջոցառումների շրջանը, նպատակ ուներ վերլուծել ՄԱԿ-ի գլխավոր ասամբլեայի (վեհաժողովի) 2000թ. կայացած 23-րդ հատուկ նստաշրջանից հետո անցած ժամանակամիջոցում Պեկինյան հռչակագրի և Պեկինյան գործողությունների պլատֆորմի կատարման ուղղությամբ ՄԱԿ-ի անադամ պետությունների ձեռքբերումները, խոչընդոտները և հետագա ռազմավարությունը:
ՀՀ վարչապետին կից կանանց խորհրդի նախորդ նիստերում տրված հանձնարարականների և պատրաստվող զեկույցի շուրջ լայն քննարկումների արդյունքում Հայաստանի պատվիրակությունը հասցրել էր պատշաճ նախապատրաստվել նստաշրջանին: Պատվիրակության անդամները, որոնք և իշխանության, և հասարակական կազմակերպությունների ներկայացուցիչներ են, կանանց խորհրդի նիստում, մասնակցության վերաբերյալ տեղեկատվությունից բացի, ներկայացրել են նստաշրջանի արդյունքում ձևավորված առաջարկները:
Այսօրվա նիստում կատարված աշխատանքի հաշվետվությունն են ներկայացրել նաև խորհրդի աշխատանքային խմբերը: Ըստ այդմ, խոսվել է կրթության, մշակույթի, առողջապահության, սոցիալական ոլորտներում իրականացված միջոցառումների և այդ ոլորտներում կանանց խորհրդի անդամներին մտահոգող մի շարք խնդիրների լուծմանն ուղղված առաջարկությունների մասին:
