ուրբաթ, 20 մայիսի 2005
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 16 բարեգործական ծրագիր: Մասնավորապես, քննարկվել ու հաստատվել են «Հայաստան» համահայկական հիմնադրամի կողմից իրականացվող Ստեփանակերտի քաղաքային պոլիկլինիկայի կաթսայատան ՕԿՋ-ի, էլեկտրական ենթակայանի, գազամատակարարման — բարեկարգման նախագծման աշխատանքների իրականացման, Հայկական բարեգործական ընդհանուր միության Հայաստանի ներկայացուցչության կողմից իրականացվող «Գյումրի քաղաքի Լորդ Բայրոնի անվան դպրոցի սպորտհրապարակի բարեկարգում» և Մայր Աթոռ Սուրբ Էջմիածնի միաբանական շենքի Ա ևԲ մասնաշենքերի ու Գ, Դ և Ե մասնաշենքերի 2-րդ փուլի շինարարության ծրագրերը:
Հաստատվել են նաև Մայր Աթոռ Սուրբ Էջմիածնի կողմից իրականացվող Մայր Աթոռ Սուրբ Էջմիածնի նոր կաթսայատան և ջրային տնտեսության համալիրի կաթսայատան համաշինարարական, Երևանի Սուրբ Գրիգոր Լուսավորիչ Մայր եկեղեցու ավտոկայանատեղի շինարարության, Երևանի Հովսեփյան 8 հասցեի (նախկին մշակույթի պալատ)շենքի մուտքի մասի և ձախ թևի հիմնանորոգման աշխատանքների, «Վորլդ Վիժն Ինթերնեյշնլ» միջազգային բարեգործական կազմակերպության հայաստանյան մասնաճյուղի կողմից իրականացվող «Գյումրիի տարածքային զարգացման ծրագրի տարածքում գտնվող մանկապարտեզների համար լոկալ կաթսայատան կառուցման», «Գյումրիի N 41 դպրոցի մարմնամարզության դահլիճի վերանորոգման» և «Կապեր եկեղեցու, համայնքների և կառավարության հետ» ծրագրերը: «Շարժական բժշկական խմբեր» ծրագրի նպատակն է բարելավել առաջնային բուժօգնությունը Լոռվա, Գեղարքունիքի, Տավուշի և Սյունիքի մարզերի դժվար հասանելի համայնքներում:
«Բժիշկներ առանց սահմանների-Բելգիա» կազմակերպության հայաստանյան մասնաճյուղը «Արտահիվանդանոցային աջակցություն հոգեկան առողջության խնդիրներ ունեցող անձանց» և «Բուժօգնության մատչելիության բարելավում» ծրագրերը կիրականացնի Վարդենիսի և Ճամբարակի շրջաններում, իսկ «Բժիշկներ առանց սահմանների հունական բաժանմունք» հասարակական միավորման հայաստանյան մասնա ճյուղը՝ «Սեռավարակների և ՄԻԱՎ/ՁԻԱՀ կանխարգելում, սեռավարակների դեպքերի կառավարում» ծրագիրը՝ Շիրակի մարզում:
«Ընդդեմ իրավական կամայականության» ՀԿ-ի կողմից կիրականացվի «Մասնակցային մոնիտորինգի և համայնքի կարողությունների հզորացում` ուղղված աղքատության հաղթահարմանը» ծրագիրը:
«Հայ դպրոց» հիմնադրամի կողմից 2005-2008թթ. իրականացվող ծրագրի նպատակն է դպրոցական աթոռ-գրասեղաններով, գրատախտակներով և ուսուցչական աթոռ-գրասեղաններով Հայաստանի կրթական պետական համակարգի բոլոր կարիքավոր դպրոցների ապահովումը:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման 12 ծրագրեր:
