ուրբաթ, 20 մայիսի 2005
ՀՀ վարչապետ Անդրանիկ Մարգարյանի նախագահությամաբ այսօր տեղի է ունեցել «Համահայկական երիտասարդական միջազգային կենտրոն» հիմնադրամի հոգաբարձուների խորհրդի նիստ: Ներկայացվել է հիմնադրամի 2004թ. գործունեության և ֆինանսական ծախսերի մասին հաշվետվությունը, նաև 2005թ. գործունեության ծրագիրը: Տարեկան հաշվետվության համաձայն, Համահայկական երիտասարդական միջազգային կենտրոնի ծրագրերը ներառել են մի քանի ուղղություններ՝ ծրագրեր, միտված Հայրենիք-Արցախ-Սփյուռք երիտասարդական կապերի ամրապնդմանը, միջազգային երիտասարդական համագործակցությանը, որը պետք է նպաստի Հայաստանի և Արցախի երիտասարդական կազմակերպությունների, երիտասարդական քաղաքականության և ծրագրերի միջազգային ինտեգրացիային, ինչպես նաև ՀՀ երիտասարդական պետական քաղաքականության զարգացմանն ուղղված ծրագրեր: Այդ ուղղությունների շրջանակում հավանության են արժանացել և Համահայկական երիտասարդական հիմնադրամի հետ համագործակցությամբ իրականացվել «Բազե-ձմեռ 2004» և «Բազե-2004» երիտասարդական հավաքները, նաև Համահայկական երիտասարդական երկրորդ համաժողովը, միջազգային երիտասարդական ծրագիրը Լեռնային Ղարաբաղում, որին մասնակցել են 11 միջազգային և արտերկրյա կազմակերպությունների պատվիրակներ: Հիմնադրամի կողմից կազմակերպված միջազգային ուսումնասիրողական այցը ԼՂ կրել է «Երիտասարդական աշխատանքը հակամարտությունների տարածաշրջաններում. մարդու իրավունքներ, ժողովրդավարություն և մասնակցություն» խորագիրը:
Խորհրդի անդամներին ներկայացվել են նաև հաշվետու ժամանակաշրջանում իրականացված մի շարք այլ աշխատանքներ՝ ուղղված տեղական երիտասարդական հասարակական կազմակերպությունների աջակցությանը և այլն:
Հաշվետվությունը հաստատելուց հետո, խորհուրդը քննարկել է ընթացիկ տարում հիմնադրամի կողմից իրականացվելիք ծրագրերը և ֆինանսական ծախսերի նախահաշիվը: Նպատակ ունենալով շարունակել նախաձեռնած աշխատանքները, հիմնադրամը նախատեսում է ընդլայնել Համահայկական երիտասարդական համագործակցության առկա դաշտը, առաջնորդվելով երկրորդ համաժողովի որոշումներով, նախաձեռնել Համահայկական երիտասարդական երրորդ համաժողովի կազմակերպումը, շարունակել երիտասարդական աշխատանքը և համագործակցությունը ԼՂ-ում, նախաձեռնել ՀՀ երիտասարդական և ուսանողական կազմակերպությունների խորհրդաժողով, ակտիվ մասնակցություն ունենալ Հայոց ցեղասպանության 90-ամյակի և Հայոց գրերի ստեղծման 1600-ամյակի համապետական միջոցառումներին, ինչպես նաև մի շարք փոքր ծրագրեր իրագործել միջազգային երիտասարդական աշխատանքի և համագործակցության, ազգային երիտասարդական քաղաքականության տարբեր խնդիրներին նվիրված:
