երեքշաբթի, 31 մայիսի 2005
Այսօր կառավարությունում տարածքային կառավարման նախարար Հովիկ Աբրահամյանն ընդունել է Ռուսաստանի Դաշնության նախագահի աշխատակազմի ղեկավար, Հայաստանում Ռուսաստանի տարվա միջոցառումների անցկացման կազմակերպական կոմիտեի նախագահ Դմիտրի Մեդվեդևին:
Նշելով 2005թ. Հայաստանում Ռուսաստանի և 2006թ. Ռուսաստանում Հայաստանի տարվա միջոցառումների անցկացման կարևորությունը հայ-ռուսական բարեկամության հետագա խթանման գործում, նախարար Հովիկ Աբրահամյանը, որը նաև միջոցառումների կազմակերպման հայկական կոմիտեի նախագահն է, գոհունակություն է հայտնել Ռուսաստանի տարվա ծրագրի շրջանակներում մեր երկրում անցկացվող միջոցառումների, մասնավորապես, Մոսկվայի գեղարվեստական թատրոնի, Մեծ թատրոնի հյուրախաղերի, հաղթանակի 60-ամյակին նվիրված լուսանկարչական ցուցահանդեսի կազմակերպական բարձր մակարդակից: Դմիտրի Մեդվեդևը, իր հերթին, շնորհակալություն է հայտնել Հայաստանի կառավարությանը՝ միջոցառումների կազմակերպմանը շահագրգիռ աջակցություն ցուցաբերելու համար: Այնուհետև կողմերը քննարկել են Հայաստանում Ռուսաստանի տարվա ծրագրով նախատեսված հետագա միջոցառումների իրականացման ընթացքը, որն ընդգրկում է ինչպես մշակութային, գիտական, կրթական, երիտասարդական, այնպես էլ առևտրատնտեսական, գործարար կապերի ոլորտները:
Հովիկ Աբրահամյանը և Դմիտրի Մեդվեդևը պայմանավորվել են, որ մինչև այս տարվա հունիսի կեսերը ռուսական կողմին կներկայացվի նաև 2006թ. Ռուսաստանում Հայաստանի տարվա միջոցառումների նախնական ծրագիրը: Խոսելով թե Հայաստանում և թե Ռուսաստանում կազմակերպվելիք միջոցառումների մասին, զրուցակիցներն ընդգծել են դրանք ոչ միայն մայրաքաղաքներում ու խոշոր կենտրոններում, այլև մարզերում, առանձին վարչական սուբյեկտներում անցկացնելու կարևորությունը:
