երկուշաբթի, 7 մայիսի 2001
Այսօր ՀՀ վարչապետ Անդրանիկ Մարգարյանն ընդունեց Վերակառուցման և զարգացման եվրոպական բանկի նախագահ Ժան Լեմիերին, որը ՀՀ կառավարության պաշտոնական հրավերով մայիսի 6-7-ը գտնվում է Հայաստանում:
Հանդիպման ընթացքում երկուստեք հավաստվեց համագործակցությունն այսուհետ ևս շարունակելու և զարգացնելու ցանկությունն ու պատրաստակամությունը: ՀՀ վարչապետը հույս հայտնեց, որ պրն Լեմիերի, իբրև Հայաստան այցելող ՎԶԵԲ-ի առաջին նախագահի, այցը նոր խթան կհանդիսանա հետագա փոխգործակցությունն ավելի արդյունավետ դարձնելու և հեռանկարային նոր ծրագրեր քննարկելու համար:
Զրույցի ընթացքում անդրադարձ եղավ բանկի կողմից Հայաստանում իրագործված, ինչպես նաև ընթացքի մեջ գտնվող ծրագրերին, կարևորվեց հետագա ծրագրերը հրապարակային և թափանցիկ իրագործելու անհրաժեշտությունը: ՎԶԵԲ-ի նախագահի խնդրանքով ՀՀ վարչապետը ներկայացրեց կառավարության տնտեսական քաղաքականության հիմնական սկզբունքներն ու մոտեցումները: Ժան Լեմիերը ողջունելի համարեց գործադիր իշխանության ջանքերը ներդրումային միջավայրի բարելավման ուղղությամբ և հույս հայտնեց, որ վերջնարդյունքում հնարավոր կլինի այստեղ էական տեղաշարժերի մասին խոսել:
Հանդիպմանը քննարկվեցին նաև համագործակցության փոխշահավետ և հետաքրքրություն ներկայացնող ոլորտները՝ էներգետիկա, բանկային համակարգ, հեռահաղորդակցություն, փոքր ու միջին ձեռնարկատիրություն և այլն:
ՀՀ վարչապետ Անդրանիկ Մարգարյանը և ՎԶԵԲ-ն նախագահ Ժան Լեմիերը հանդիպեցին նաև լրագրողների հետ՝ մանրամասնելով հանդիպման արդյունքները և ձեռք բերված պայմանավորվածությունները:
