երեքշաբթի, 14 հունիսի 2005
ՀՀ վարչապետ Անդրանիկ Մարգարյանն այսօր ընդունել է Համաշխարհային բանկի տարածաշրջանային փոխնախագահ Շիգեո Կացուին:
Պարոն Կացուն վարչապետին է ներկայացրել իր այցի շրջանակներում վերջին օրերին կայացած հանդիպումների, մասնավորապես ՀՀ տարածքային կառավարման, ֆինանսների և էկոնոմիկայի նախարարների հետ ունեցած բանակցությունների արդյունքները, որոնց ընթացքում հանգամանորեն քննարկվել են տեղական ինքնակառավարման, գյուղական վայրերի ենթակառուցվածքների և այլ ոլորտներում բարեփոխումների ընթացքի հետ կապված հարցեր: Նշելով, որ իրականում շատ բան է փոխվել հասարակական կյանքի և տնտեսության տարբեր բնագավառներում վերջին տարիներին անցկացված բարեփոխումների արդյունքում, Շիգեո Կացուն հավաստել է ՀԲ-ի կողմից ֆինանսավորվող ծրագրերի շարունակմանն ուղղված բանկի ղեկավարության պատրաստակամությունը: Նա ընդգծել է, որ թերևս ժամանակն է առանձին ծրագրերից անցնելու նաև միջնաժամկետ ու երկարաժամկետ ծրագրերի մշակմանն ու իրականացմանը, մասնավորապես ենթակառուցվածքների ոլորտում: Համաշխարհային բանկի փոխնախագահը կարևոր է համարել նաև ինչպես ՀԲ-ի կողմից ֆինանսավորվող ծրագրերի, այնպես էլ ԱՄՆ-ի «Հազարամյակի մարտահրավերներ» կորպորացիայի, միջազգային այլ կառույցների կողմից առաջիկայում ակնկալվող ծրագրերի փոխհամաձայնեցված իրագործումը:
Վարչապետ Անդրանիկ Մարգարյանը նշել է, որ Հայաստանի կառավարությունն անցած տարիներին արդեն Համաշխարհային բանկի հետ համագործակցության որոշակի փորձ է ձեռք բերել, որն անհրաժեշտ է օգտագործել հետագա ծրագրերն առավել արդյունավետորեն իրականացնելու համար: Ըստ նրա, Հայաստանի կառավարության գնահատմամբ Համաշխարհային բանկի հետ գործակցությունը տալիս է իր դրական արդյունքը, որն զգալի է տարբեր ոլորտներում տեղի ունեցող բարեփոխումների վրա, որոնք ընթանում են Աղքատության հաղթահարման ռազմավարական ծրագրի խնդիրների ու նպատակների իրագործման շրջանակներում: Վարչապետը վստահություն է հայտնել, որ ՀԲ-ի հետ համագործակցությունն առաջիկայում ևս նույն հաջողությամբ կշարունակվի:
