երեքշաբթի, 28 հունիսի 2005
Այսօր կառավարությունում, ՀՀ տարածքային կառավարման նախարար Հովիկ Աբրահամյանի մոտ տեղի է ունեցել խորհրդակցություն՝ շահագրգիռ նախարարությունների և գերատեսչությունների, մարզպետների մասնակցությամբ: Քննարկվել են գույքահարկ վճարողների հաշվառման և ֆիզիկական անձանց գույքահարկի հաշվարկման գործառույթները հարկային մարմիններից գյուղական համայնքներին փոխանցելու հետ կապված աշխատանքների ընթացքը, ինչպես նաև այդ գործառույթներն իրականացնող քաղաքային համայնքներում գույքահարկի հավաքագրման արդյունքները՝ 2005թ. առաջին հինգ ամիսների կտրվածքով։
ՀՀ կառավարությանն առընթեր հարկային ծառայության պետի տեղակալ Արմեն Ալավերդյանը ներկայացրել է «Գույքահարկի մասին» ՀՀ օրենքով և ՀՀ կառավարության համապատասխան որոշումներով սահմանված կարգերի համաձայն գյուղական համայնքներին գույքահարկի հաշվարկման տեղեկատվական բազաների փոխանցման ընթացքը, նշելով, որ արդեն իսկ շուրջ 200 գյուղական համայնքներ ինքնուրույն են իրականացնում այդ գործառույթը։
ՀՀ տարածքային կառավարման նախարարն ուշադրություն է հրավիրել առանձին մարզերում տեղեկատվության փոխանցման դանդաղ ընթացքի վրա և հանձնարարել է 10-օրյա ժամկետում ձեռնարկել կազմակերպական անհրաժեշտ միջոցառումներ՝ ժամանակացույցով նախատեսված աշխատանքներն իրականացնելու համար:
Հանձնարարվել է նաև մինչև 2005թ. հուլիսի 20-ը ճշտել պետական բյուջեից համայնքներին տրվող դոտացիաների հաշվարկման համար անհրաժեշտ ելակետային տվյալները, հարկային ծառայության միջոցով` սահմանված ժամկետներում ֆինանսների և էկոնոմիկայի նախարարություն ներկայացնելու համար:
