ուրբաթ, 19 օգոստոսի 2005
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 13 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող ԼՂՀ Մարտակերտի շրջանի առավել հիմնահարցային բնակավայրերի սոցիալ-տնտեսական իրավիճակի գնահատման և սոցիալ-տնտեսական առաջնայնությունների տարակարգման, Աշտարակ քաղաքի Ղափանցյանի անվան միջնակարգ դպրոցի դահլիճի տանիքի և առաստաղի վերանորոգման աշխատանքների, օլիմպիական հերթափոխի պետական մարզական ուսումնարանի արտաքին կոյուղու ցանցի վերակառուցման, ՀՀ Արմավիրի մարզի Հացիկ գյուղի տարածքում նոր խորքային հորի հորատման աշխատանքների իրականացման ծրագրերը: Հաստատվել են Մայր Աթոռ Սուրբ Էջմիածնի կողմից իրականացվող Սուրբ Գայանե վանքային համալիրի և միաբանության շենքի վերանորոգման և Մայր Աթոռ Սուրբ Էջմիածնի պահեստի շենքի ուժեղացման ծրագրերը ևս:
«Մեկ ազգ, մեկ մշակույթ» հիմնադրամի կողմից իրականացվող «Պահպանենք մեր մշակույթը» ծրագրի նպատակն է ներկայացնել ազգային բազմաբնույթ մշակութային արժեքները ՀՀ մարզերում և Արցախում:
«Մոլեկուլյար էվոլյուցիայի Էյգենի մոդելի ճշգրիտ լուծումը և էվոլյուցիայի ինֆորմացիոն ու կանալային ասպեկտները» ծրագիրը կիրականացվի Երևանի ֆիզիկայի ինստիտուտում՝ գիտության և առաջատար տեխնոլոգիաների ազգային հիմնադրամի կողմից, իսկ «Բժշկական օգնություն սոցիալապես անապահով բնակչությանը» ծրագիրը՝ ԱՄՆ-ի «Բժշկական օգնություն հայերին» հասարակական բարեգործական կազմակերպության հայաստանյան ներկայացուցչության կողմից:
«Ուսանողական ջոկատների հանրապետական շտաբ-կամավորական աշխատանքների ծառայություն» հասարակական կազմակերպությունը կյանքի կկոչի «Միջազգային կամավորական աշխատանքի ճամբարների կազմակերպում Հայաստանում», իսկ Ամերիկահայ բժշկական խնամքի բարեսիրական ընկերությունը՝ Դիլիջանի հակատուբերկուլյոզային առողջարանին աջակցության ծրագրերը:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
