հինգշաբթի, 10 մայիսի 2001
Այսօր տեղի ունեցավ կառավարության հերթական նիստը, որը վարում էր վարչապետ Անդրանիկ Մարգարյանը:
Նիստում հաստատվեց «Աշխատանքի դիմաց նպաստի նշանակման և վճարման կարգը», որով նախատեսվում է բնակչության առավել ծանր պայմաններում գտնվող չզբաղված կամ գործազուրկի կարգավիճակ ունեցող անդամներին որոշակի ժամկետներում ապահովել նպաստով, որի համար հիմք կհանդիսանա նրանց՝ հասարակական աշխատանքներում ընդգրկված լինելու փաստը: Նախագծում հստակ տրված է «հասարակական աշխատանք» հասակացության սահմանումը, դրա կազմակերպման ոլորտները, ծրագրերի հաստատման և իրականացման կարգը: Իրականացվող տարբեր ծրագրերը համակարգելու նպատակով նախատեսվում է Երևանում և մարզերում ստեղծել հասարակական հիմունքներով գործող հանձնաժողովներ: Որոշմամբ հաստատվեց 2001 թ. պետական բյուջեի «Նպաստներ աշխատանքի դիմաց» հոդվածով նախատեսված ֆինանսական միջոցների բաշխումն ըստ մարզերի (Երևան քաղաքի)՝ հաշվի առնելով գործազրկության մակարդակը և աղքատության ընտանեկան նպաստի համակարգում ընդգրկված ընտանիքների թիվը:
Գործադիրը հաստատեց Լոռու և Արագածոտնի մարզերի առողջապահության համակարգերի օպտիմալացման ծրագրերը, որոնք նախատեսվում է ավարտել ընթացիկ տարում: Նշվեց, որ օպտիմալացման հիմնական նպատակը բուժհաստատությունների կառուցվածքային փոփոխությունների իրականացման ճանապարհով՝ առկա առողջապահական համակարգը բնակչության իրական պահանջարկին համապատասխանեցնելն է, ֆինանսական պետական հատկացումների օգտագործման արդյունավետության, բուժօգնության որակի ու մատչելիության բարձրացումը: Մարզպետներին հանձնարարվեց մեկամսյա ժամկետում կառավարություն ներկայացնել ազատված շենքերի հետագա օգտագործման և տնօրինման մասին առաջարկություններ:
Կառավարությունն արձանագրային որոշմամբ հավանություն տվեց ՀՀ-ում 2000 թ. երաշտի հետևանքների վերացման ծրագրի իրականացման ընթացքի մասին հաղորդմանը:
Գործադիրը բարձրլեռնային բնակավայրի կարգավիճակ շնորհեց Գեղարքունիքի մարզի Վարդենիս քաղաքին: Վարչապետը քաղաքաշինության նախարարին հանձնարարեց երկամսյա ժամկետում վերանայել հանրապետության բարձրլեռնային բնակավայրերի ցանկը՝ հաշվի առնելով ներկայում գործող չափորոշիչները:
Նիստում ընդունվեց ՀՀ քաղաքացիական ավիացիայի համակարգում մի շարք միջոցառումներ իրականացնելու մասին որոշում, որով մասնավորապես հաստատվում է համատեղ բազավորման աերոդրոմների օգտագործման կարգը և ՀՀ քաղաքացիական ավիացիայի համակարգում գործող օդանավակայանների ցանկը: Վերջինում ներառված են Երևանի «Զվարթնոց» միջազգային, Գյումրիի «Շիրակ» և «Ստեփանավան» օդնավակայանները:
Կառավարությունը հաստատեց ՀՀ աշխարհագրական անվանումների հաշվառման և գրանցման, պետական քարտադարանի ստեղծման և վարման կարգը: Դրանով կանոնակարգվում են նշված գործառույթները, որոնք իրականացվում են ՀՀ աշխարհագրական անվանումների կանոնավորման, միօրինականացման, օգտագործման, ինչպես նաև դրանց վերաբերյալ պաշտոնական տեղեկատվության ստեղծման և տրամադրման նպատակով: ՀՀ աշխարհագրական օբյեկտների անվանումները գրանցվում և հաշվառվում են հայերեն՝ կառավարությանն առընթեր անշարժ գույքի կադաստրի պետական կոմիտեի կողմից:
Նիստում ընդունվեց «Ավելացված արժեքի հարկի մասին» ՀՀ օրենքի համաձայն հարկային տեսչության մարմիններին տեղեկությունների ներկայացման նպատակով դրանցում ներառման ենթակա հարկային հաշիվներում ցույց տրված հարկվող շրջանառության չափի սահմանման մասին որոշում: Ըստ դրա, ԱԱՀ վճարող համարվող անձինք իրենց հաշվառման վայրի տարածքային հարկային տեսչություններին ներկայացվող տեղեկություններում ներառում են տվյալ հաշվետու ժամանակաշրջանում մատակարար կազմակերպություններից ստացված և իրենց կողմից դուրս գրված այն հարկային հաշիվները, որոնցում ցույց տրված հարկվող շրջանառության արժեքը (առանց ակցիզային հարկի և ԱԱՀ-ի) գերազանցում է 500 հազար դրամը: Որոշման մեջ նշված տեղեկություններում ներառվում են այն հարկային հաշիվները, որոնք վերաբերում են 2001 թ-ի հուլիսի 1-ից հետո իրականացված գործարքներին:
Գործադիրը որոշեց ԱԺ ներկայացնել «ՀՀ արժեթղթերի հանձնաժողովի 2000 թ. գործունեության տարեկան հաշվետությունը հաստատելու մասին» ՀՀ օրենքի նախագիծը:
Կոտայքի մարզի Ողջաբերդ գյուղում տնակային եղանակով դպրոցի աշխատանքները կազմակերպելու և շահագործման հանձնելու նպատակով, որոշվեց կառավարության պահուստային ֆոնդից հատկացնել 3,5 մլն դրամ:
