երկուշաբթի, 5 սեպտեմբերի 2005
ՀՀ վարչապետ Անդրանիկ Մարգարյանի որոշմամբ Գագիկ Խաչատրյանն ազատվել է «Պետական գնումների գործակալություն» պետական ոչ առևտրային կազմակերպության պետի պաշտոնից:
Վարչապետի մեկ այլ որոշմամբ «Պետական գնումների գործակալություն» պետական ոչ առևտրային կազմակերպության պետ է նշանակվել Հակոբ Բեգլարյանը:
Համառոտ կենսագրական տվյալներ
Հակոբ Բեգլարյանը ծնվել է 1966թ., Երևանում: 1991թ. ավարտել է Երևանի ժողտնտեսության ինստիտուտը՝ տնտեսագետի որակավորմամբ: Աշխատանքային գործունեությունն սկսել է 1984-85թթ.՝ Երևանի «Շինանյութ» փորձարարական գործարանում իբրև կաղապարող:
1990-1994թթ. աշխատել է Երևանի Օրջոնիկիձեի և Էրեբունու շրջանների հարկային տեսչություններում իբրև բաժնի տեսուչ, 1994-96թթ. եղել է Երևանի «Նարեկ» կարի ֆաբրիկայի փոխտնօրեն, ապա տնօրեն, 1996-2000թթ.՝ «Նարեկ» բաց բաժնետիրական ընկերության նախագահ:
2000թ.-ից մինչև նշանակումը զբաղեցրել է «Պետական գնումների գործակալություն» ՊՈԱԿ-ի պետի տեղակալի պաշտոնը:
ՀՀԿ անդամ է: Ամուսնացած է, ունի 3 երեխա:
