երեքշաբթի, 20 սեպտեմբերի 2005
ՀՀ վարչապետ Անդրանիկ Մարգարյանի ուղերձը Հայաստանի Հանրապետության Անկախության տոնի առթիվ
Սիրելի հայրենակիցներ,
Շնորհավորում եմ ձեզ Հայաստանի Անկախության տոնի առթիվ: 14 տարի առաջ, սեպտեմբերի 21-ին ընտրելով անկախության ուղին` մեր ժողովուրդն իրականություն դարձրեց ազատատենչ իր նախնիների նվիրական երազանքը, հաստատեց աշխարհի քաղաքակիրթ երկրների ու ժողովուրդների շարքում իր ազատ ու անկախ, արժանավայել կյանքը կերտելու աներեր ձգտումը, քաջ գիտակցելով, որ Անկախություն` նախ և առաջ նշանակում է ազգային արժանապատվության գիտակցում, հավատ սեփական ուժերին, ինքնիշխան պետություն և պետականության գաղափարով առաջնորդվող քաղաքացի, ազգային արժեքների պահպանում և համամարդկային արժեքային համակարգում այդ ամենի պատշաճ ներկայացում:
Անցած տարիները ցույց տվեցին, որ անկախության գաղափարի շուրջ համախմբվելով` մենք կարող ենք անձնվիրաբար հաղթանակել պատերազմի դաշտում և հաղթահարել բազում փորձություններ ու դժվարություններ: Արժանին մատուցելով անկախության համար իրենց կյանքը նվիրաբերած հերոսների անմոռաց հիշատակին և քայլ առ քայլ կերտելով մեր անկախ պետականությունը, մենք չպետք է մոռանանք, որ տակավին երիտասարդ մեր պետությանն այսօր էլ լուրջ մարտահրավերներ են նետված, որոնք դիմագրավելու համար պետք է միասնական լինենք` զերծ պահելով պետությունը ցնցումներից, սեփական հավակնություններն ամեն ինչից վեր դասող կամ հայացքը մշտապես օտար տերություններին ուղղած «փրկիչներից», որոնց օտարահաճ տեսակը մեր ժողովրդի պատմության ընթացքում, ցավոք, դառը դասեր է թողել:
ժողովրդավարության, քաղաքացիական հասարակության կառուցման ճանապարհին մենք բոլորս` իշխանություններն ու քաղաքական ուժերը, ամբողջ հասարակությունը, դեռևս որոշակի աշխատանք ունենք կատարելու: Կարևորը` դրա համար կա բավարար կամք և ներուժ: Մենք արդեն զգալի առաջընթաց ունենք տնտեսական դաշտում, բանակաշինության բնագավառում, որոնք կարևոր երաշխիքներ են` անցած 14 տարիների մեր ձեռքբերումները պահպանելու և հետագայում մեր համազգային նպատակներին հասնելու համար:
Կրկին շնորհավորում եմ բոլորիդ և մաղթում տոնական բարձր տրամադրություն:
