երեքշաբթի, 18 հոկտեմբերի 2005
Գոհունակություն հայտնելով ԱՄՀ-ի հետ Հայաստանի համագործակցության, համատեղ մշակվող ծրագրերի իրականացման ներկա մակարդակից, կողմերը նշել են, որ փոխշահավետ գործակցությունը զարգացնելուն ուղղված դեռևս լայն հնարավորություններ կան: Վարչապետը վստահություն է հայտնել, որ համագործակցության խթանմանը, անկասկած, կարող է նպաստել նաև պարոն Ջերոն Քրեմերսի ներկա այցը մեր երկիր:
ԱՄՀ-ի գործադիր տնօրենն ընդգծել է, որ Հայաստանի հետ ներկայումս իրականացվող՝ Աղքատության հաղթահարման ռազմավարությանն աջակցելուն ուղղված ծրագիրը բավականին սահուն է ընթանում: Տպավորիչ համարելով վերջին մի քանի տարիներին Հայաստանում արձանագրվող տնտեսական աճը, նա գոհունակություն է հայտնել, որ դրա արդյունքները սկսել են նկատելի լինել նաև հանրապետության մարզերում, չնայած այս ուղղությամբ դեռևս զգալի անելիքներ կան: Ջերոն Քրեմերսը հույս է հայտնել, որ համագործակցությունը նույն հաջողությամբ կշարունակվի նաև առաջիկայում: Նրա խնդրանքով վարչապետ Անդրանիկ Մարգարյանը համառոտակի ներկայացրել է Հայաստանի տնտեսական զարգացման հեռանկարները, տնտեսական ու սոցիալական հիմնախնդիրների լուծմանն ուղղված քայլերն ու ծրագրերը, մասնավորապես, փոքր ու միջին գործարարության խթանման, ներքին ներդրողների համար բարենպաստ պայմանների ապահովման, «Հազարամյակի մարտահրավերների» ծրագրի շրջանակներում հատկապես մարզերի ու ենթակառուցվածքների զարգացման նախաձեռնությունները:
Ջերոն Քրեմերսը շնորհակալություն է հայտնել ԱՄՀ-ի 12 երկրների խմբի հանդիպումը հաջորդ տարվա հունիսին Երևանում անցկացնելու՝ հայկական կողմի պատրաստակամության համար: Նա վստահությույն է հայտնել նաև, որ այս տարվա նոյեմբերին Հայաստանի հետ ԱՄՀ-ի համագործակցության ծրագրի հերթական ուսումնասիրությունը և դրա շուրջ քննարկումները նույնքան հաջողությամբ կընթանան:
Հանդիպման ավարտին կողմերը մեկ անգամ ևս իրենց պատրաստակամությունն են հայտնել ԱՄՀ-Հայաստան համագործակցությունը շարունակելու և զարգացնելու վերաբերյալ:
