երկուշաբթի, 21 մայիսի 2001
Այսօր ՀՀ վարչապետ Անդրանիկ Մարգարյանը հրավիրել էր գործարարության աջակցման խորհրդի նիստ, որի օրակարգում նախատեսված էր քննարկել «Ներդրումների մասին» ՀՀ օրենքի նախագծի նոր տարբերակը, հարկային դաշտի վերաբերյալ «Քեյ-Փի-Էմ-Ջի» Արմենիա ՓԲԸ-ի առաջարկությունների փաթեթը, ներդրումային միջավայրի բարելավմանն ուղղված՝ ՀՀ արդյունաբերության և առևտրի նախարարության առաջարկները և գործարարությանն առնչվող «պրոբլեմների բանկ»-ում կուտակված հարցերը:
Մինչ նշված հարցերին անցնելը, խորհրդի քարտուղար, Զարգացման հայկական գործակալության գործադիր տնօրեն Վահագն Մովսիսյանը ներկայացրեց նախորդ՝ ապրիլի 10-ի նիստում տրված հանձնարարականների կատարման ընթացքը: Դրանցից մեկը վերաբերում էր այլ երկրներում արտադրության զարգացմանն ուղղված երկարաժամկետ ներդրումների խրախուսման միջոցառումներին, փորձի և օրենսդրական դաշտի վերբերյալ՝ խորհրդի անդամներին ամփոփ տեղեկատվություն հաղորդելը, ինչը և արվեց:
«Ներդրումների մասին» օրենքի նախագծի շուրջ խորհրդի նիստում տարբեր տեսակետներ հնչեցին: Վարչապետի առաջարկով հարցը տեղափոխվեց հաջորդ նիստի օրակարգ, որպեսզի մանրամասն ծանոթանան օրինագծին և մյուս քննարկման ժամանակ հստակ տեսակետ արտահայտեն՝ պատասխանելով նաև այն հարցադրմանը, թե որքանո՞վ Է անհրաժեշտ «Ներդրումների մասին» առանձին օրենք ունենալը, երբ տարբեր օրենքներում ներդրումային դաշտին վերաբերող կարգավորիչ հոդվածներ կան, որոնք, հարկ եղած դեպքում, կարելի է փոփոխության ենթարկել կամ լրացնել:
Օրակարգի մեկ այլ՝ այդյունաբերության և առևտրի նախարարության ներկայացրած առաջարկները ծնվել էին Հայաստանում գործող օտարերկրյա խոշոր ներդրողների հետ հանդիպման արդյունքում, որի նպատակը եղել է մեր երկրում հանդիպող այն դժվարությունների, վարչարարական խոչընդոտների վերհանումը, որոնց իրենց գործունեության ընթացքում ներդրողներն առնչվում են: Դրանց վերացմանն ուղղված առաջարկները մեկ առ մեկ քննարկվեցին, դիտարկելով նաև խորհրդի անդամ գործարարների օրինակը, և մի մասը հավանության արժանացան:
«Պրոբլեմների բանկ»- ում ընդգրկվել էին շուրջ 2 տասնյակ հարցեր, որոնցից մի քանիսն այսօր քննարկվեցին, մյուսները տեղափոխվեցին հաջորդ նիստ: Քննարկման վերջնարդյունքում այդ պրոբլեմներից կընտրվեն հրատապ լուծում պահանջողները և առաջնահերթության կարգով կընդգրկվեն խորհրդի առաջիկա նիստերի օրակարգում:
Որոշվեց Գործարարության աջակցման խորհրդի հաջորդ նիստն անցկացնել հուլիսի 3-ին, իսկ մինչ այդ՝ վարչապետի նախագահությամբ Զարգացման հայկական գործակալության խորհրդի նիստում կամփոփվեն Նյու Յորքի գործարար համաժողովի արդյունքները, կհստակեցվեն դրանց հետ կապված անելիքները:
