չորեքշաբթի, 26 հոկտեմբերի 2005
ՀՀ վարչապետ Անդրանիկ Մարգարյանն այսօր ընդունել է Միջազգային գիտատեխնիկական կենտրոնի (ՄԳՏԿ) ղեկավարների խորհրդի նախագահ, դոկտոր Ռոնալդ Լեմանին և նրա տեղակալ Էլին Վիրջինիոյին, որոնք Հայաստանում են գտնվում «Տարածաշրջանային համագործակցություն՝ բնական վտանգների հարցերով: Ռիսկի կառավարման միջոցները» միջազգային սեմինարին մասնակցելու կապակցությամբ:
Ողջունելով հյուրերին, վարչապետը գոհունակություն է հայտնել ՀՀ գիտությունների ազգային ակադեմիայի և միջազգային գիտատեխնիկական կենտրոնի միջև հաստատված սերտ համագործակցությունից, ինչը, ըստ նրա, հնարավորություն է տալիս գիտության զարգացմանն ուղղված պետական և այլ միջոցներն առավել արդյունավետորեն նպատակին ծառայեցնելու համար:
Դոկտոր Լեմանը, իր հերթին, շնորհակալություն է հայտնել վարչապետին և ՀՀ կառավարությանը Հայաստանում միջազգային գիտատեխնիկական կենտրոնի գործունեությանն ու մեր երկրում գիտության զարգացմանն աջակցելու համար: Բարձր գնահատելով հայ գիտնականների ավանդը միջազգային գիտական ծրագրերի մշակման և իրականացման գործում, նա ընդգծել է, որ դրա խոսուն վկայություններից է նաև այն, որ Մոսկվայից դուրս իր առաջին սեմինարը ՄԳՏԿ ղեկավարների խորհուրդը հրավիրել է Երևանում: Պարոն Լեմանը տեղեկացրել է, որ սեմինարի շրջանակներում քննարկվելու են նաև ՄԳՏ կենտրոնի կողմից ընդունվելիք և ֆինանսավորվելիք նոր նախագծերի վերաբերյալ առաջարկությունները, որոնցից մեկը, ըստ նրա, «Երկրագնդի մասին գիտությունների բնագավառում «Գառնի» միջազգային գիտահետազոտական կենտրոնի ստեղծման» նախագիծն է:
Հանդիպման ավարտին, կարևորելով Հայաստանում և տարածաշրջանում գիտության զարգացմանն օժանդակելու Միջազգային գիտատեխնիկական կենտրոնի գործունեությունը, վարչապետը մեկ ամգամ ևս հավաստել է այդ գործընթացին հնարավորինս աջակցելու ՀՀ կառավարության պատրաստակամությունը և հաջողություններ է մաղթել միջազգային սեմինարի աշխատանքներին:
