չորեքշաբթի, 23 մայիսի 2001
Մայիսի 23-ին տեղի ունեցավ ՀՀ կառավարության մարդասիրական օգնության կենտրոնական հանձնաժողովի հերթական նիստը, որը վարում էր հանձնաժողովի նախագահ Վ.Մովսիսյանը:
Հանձնաժողովը քննարկեց 2001-2005 թվականների ընթացքում իրականացվող 5 երկարաժամկետ բարեգործական ծրագիր:
Հաստատվեց «ԱՌԴԱ» բարեգործական հիմնադրամի կողմից Շիրակի մարզում 4 մանկապարտեզի, 1 երաժշտական դպրոցի և ծերերի ու հաշմանդամների տուն-ինտերնատի հովանավորման ծրագրերը: Հիմնադրամը իր հովանավորության տակ է վերցնում նշված հաստատությունների ամբողջական ֆինանսավորումը, կատարելով նաև դրանց շենքերի վերանորոգման-բարեկարգման, գույքի ձեռքբերման և արևային տաքացուցիչների տեղադրման աշխատանքները:
«Ընտանիք և առողջություն» հասարակական բարեգործական կազմակերպության ծրագիրը նպատակաուղղված է Պերինտոլոգիայի, մանկաբարձության և գինեկոլոգիայի կենտրոնի մանկաբարձագինեկոլոգիական ծառայության բարելավմանը, նյութատեխնիկական բազայի ամրապնդմանը, վերարտադրողական առողջապահության պահպանման համար բարենպաստ պայմանների ստեղծմանը: Այդ նպատակով, մասնավորապես, նախատեսվում է հիմնարար վերանորոգել կենտրոնի օպերատիվ գինեկոլոգիայի բաժանմունքը, վիասրահները և հիվանդասենյակները:
«Բարի նպատակ» հասարակական բարեգործական կազմակերպությունը կշարունակի Ֆրանսիայի «Հայ մարտիկների օժանդակ մարմին» կազմակերպության կողմից տրամադրվող մարդասիրական օգնության բաշխումը Երևանի գիշերօթիկ դպրոցներին և զոհված ազատամարտիկների ընտանիքներին:
«Միջազգային ակցիա սովի դեմ հիմնադրամի» հայաստանյան մասնաճյուղի ծրագրի շրջանակներում տևական երաշտի հետևանքների մեղմացման նպատակով Սյունիքի մարզի 50 համայնքներում իրականացվում է գարնանացան ցորենի և կարտոֆիլի ցանքի կազմակերպման ծրագիրը: Այդ նպատակով շուրջ 2600 ընտանիքների կտրամադրվի նաև վառելիք, պարարտանյութեր և թունաքիմիկատներ:
Բարեգործական ծրագրերի հաստատման հետ մեկտեղ հանձնաժողովը սահմանեց նաև դրանց շրջանակներում հարկային և մաքսային արտոնությունների շրջանակը:
Նիստում քննարկվեցին նաև առանձին բարեգործական ու հասարակական կազմակերպությունների հասցեով ուղարկված բարեգործական բեռների ներմուծման ու բաշխման, ինչպես նաև նախկինում հաստատված ծրագրերի իրականացման հետ անմիջականորեն կապված ու դրանց համար զգալի նշանակություն ունեցող գործարքներ և այլ հարցեր:
