ուրբաթ, 16 դեկտեմբերի 2005
ՀՀ վարչապետ Անդրանիկ Մարգարյանն այսօր ընդունել է Հայաստանում Հնդկաստանի նորանշանակ արտակարգ և լիազոր դեսպան տիկին Ռինա Պանդեյին:
Շնորհավորելով դեսպանին մեր երկրում իր դիվանագիտական առաքելությունն սկսելու կապակցությամբ, վարչապետը նշել է, որ բարեկամական Հնդկաստանի հետ հարաբերությունների համակողմանի զարգացումը գնալով ավելի մեծ կարևորություն է ձեռք բերում մեր երկրի համար և Հայաստանի կառավարությունը հատուկ ուշադրություն է դարձնում հայ-հնդկական փոխշահավետ համագործակցության ամրապնդմանն ու խորացմանը: Երկու երկրների միջև բարձր մակարդակի քաղաքական երկխոսության զարգացմանը, ըստ Անդրանիկ Մարգարյանի, նպաստել են նաև 2003թ. աշնանը ՀՀ նախագահ Ռոբերտ Քոչարյանի պետական այցը Հնդկաստան և այս տարվա հոկտեմբերին Հնդկաստանի փոխնախագահ Բհարիոն Սինգհ Շեխավատի այցը Հայաստան:
Անդրադառնալով երկու երկրների միջև առևտրատնտեսական հարաբերությունների խնդիրներին` կողմերը գոհունակությամբ արձանագրել են, որ վերջին տարիներին զգալիորեն աճել է երկկողմ առևտարշրջանառությունը: Այդուհանդերձ, զրուցակիցների համոզմամբ, մեծ է նաև չօգտագործված հնարավորությունների ներուժը: Դրա արդյունավետ իրագործման խնդրում Անդրանիկ Մարգարյանը և դեսպան Ռինա Պանդեյը կարևորել են Հայ-հնդկական միջկառավարական հանձնաժողովի դերը, որի հերթական՝ 4-րդ նիստը նախատեսվում է գումարել Երևանում 2006թ. գարնանը: Որպես երկկողմ համագործակցության հեռանկարային ուղղություններ կողմերը նշել են, մասնավորապես, տեղեկատվական տեխնոլոգիաների, գյուղատնտեսության, փոքր և միջին գործարարության, զբոսաշրջության, առողջապահության, մշակույթի, կրթության և այլ բնագավառները:
Հանդիպման ժամանակ, վարչապետ Անդրանիկ Մարգարյանը երախտագիտություն է հայտնել Հնդկաստանի կառավարության կողմից Հայաստանին տրամադրված անհատույց օգնության համար՝ ընդգծելով, որ հանրապետության մի շարք գյուղական համայնքներին հատկացվելիք հնդկական գյուղատնտեսական տեխնիկան (շուրջ 300 տրակտոր) մեծապես կօժանդակի այդ համայնքների սոցիալ-տնտեսական զարգացմանը:
Հանդիպման ավարտին վարչապետը վստահություն է հայտնել, որ տիկին Ռինա Պանդեյի պաշտոնավարման ընթացքում հայ-հնդկական փոխշահավետ համագործակցությունը կշարունակի նույն հաջողությամբ զարգանալ, հավաստել է այդ գործում դեսպանին հնարավորինս աջակցելու ՀՀ կառավարության պատրաստակամությունը և հաջողություն է մաղթել նրան՝ մեր երկրում իր դիվանագիտական առաքելությունն իրականացնելու ընթացքում:
