ուրբաթ, 23 դեկտեմբերի 2005
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի նիստ, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 8 բարեգործական ծրագիր: Մասնավորապես, քննարկվել և հաստատվել են Մայր Աթոռ Սուրբ Էջմիածնի կողմից մկրտարանի շենքի կառուցման, Մայր Աթոռ Սուրբ Էջմիածնի տուրիստական մուտքի վերանորոգման, Սևանի Վազգենյան հոգևոր դպրանոցի հին մասնաշենքի հիմնանորոգման և խմելու ջրագծի անցկացման աշխատանքների, «Հայաստան» համահայկական հիմնադրամի կողմից ՀՀ աշխատանքի և սոցիալական հարցերի նախարարության Երևանի «Նորքի մանկատուն» ՊՈԱԿ-ի ներքին ջեռուցման համակարգի շինմոնտաժային և մոտեցման աշխատանքների, գազատարների կառուցման, Լեռնային Ղարաբաղի Հանրապետության «Հյուսիս-Հարավ» ավտոմայրուղու շինարարության համար բիտումի ներկրման, «Արաբկիր» միացյալ մանկական բարեգործական հիմնադրամի կողմից 2005-2010 թվականներին իրականացվող «Արաբկիր» բժշկական համալիր- երեխաների և դեռահասների ինստիտուտի նոր մանկաբուժական մասնաշենքի կառուցման ու հին մասնաշենքերի կապիտալ վերանորոգման ծրագրերը:
«ԱՌԴԱ» բարեգործական հիմնադրամը կիրականացնի «Գյումրի-6» ծրագիրը, որի նպատակն է Գյումրի քաղաքի թիվ 6 մանակապարտեզի շենքի կենցաղային պայմանների բարելավումը, իսկ «Ձեռք ձեռքի» հասարակական կազմակերպության կողմից 2005-2007 թվականներին կյանքի կկոչվի «Անվճար շարժական ատամնաբուժական կլինիկա» ծրագիրը:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
