ուրբաթ, 3 փետրվարի 2006
ՀՀ վարչապետ Անդրանիկ Մարգարյանն այսօր ընդունել է Ուկրաինայի տրանսպորտի և կապի նախարար Վիկտոր Բոնդարին:
Զրույցի ընթացքում վարչապետը վստահություն է հայտնել, որ անկախ վերջին շրջանում Ուկրաինայում ընթացող քաղաքական զարգացումներից, հայ-ուկրաինական հարաբերությունները ամենատարբեր ոլորտներում շարունակում են զարգանալ բարձր մակարդակով ձեռք բերված պայմանավորվածությունների համաձայն: Համագործակցության զարգացման առումով նա կարևորել է երկու երկրների միջկառավարական հանձնաժողովի աշխատանքը, նշելով, որ առետրատնտեսական համագործակցության ոլորտում դեռևս առկա խնդիրներն իրենց լուծումները կստանան այդ հանձնաժողովի շրջանակներում: Անդրադառնալով տրանսպորտային փոխգործակցությանը, Անդրանիկ Մարգարյանը կարևորել է «Ուկրֆերի» ընկերության կողմից Ուկրաինայի Իլյիչևսկ նավահանգստից դեպի Հայաստան և Հայաստանից փոխադրվող բեռները Բաթումիի փոխարեն Փոթի նավահանգստով փոխադրելու, ինչպես նաև բեռնափոխադրումների սակագների վերանայման հարցերի քննարկումը, որոնք նաև միջկառավարական հանձնաժողովի օրակարգում են:
Վիկտոր Բոնդարը համառոտակի ներկայացրել է Ուկրաինայի քաղաքական, տնտեսական, այդ շրջանակում նաև տրանսպորտի և կապի ոլորտներում ընթացող զարգացումները: Նա նշել է, որ բարեփոխումների արդյունքում, մասնավորապես, վերանայվում է տրանսպորտային հաղորդակցության բնագավառում վարվող քաղաքականությունը՝ ոլորտի ազատականացման, օդային, ծովային ու երկաթուղային հաղորդակցության ոլորտների, այդ թվում՝ նավահանգիստների և օդանավակայանների կառավարումն առավելապես մասնավոր ընկերությունների հանձնելու ուղղությամբ: Ըստ նախարարի, Ուկրաինան շահագրգռված է այլ երկրների, նաև Հայաստանի հետ առավել սերտ համագործակցություն հաստատելու, որը միաժամանակ կնպաստի ինչպես ուղևորափոխադրումների, այնպես էլ բեռնափոխադրումների ծավալների մեծացմանը: Վիկտոր Բոնդարը հավաստիացրել է նաև, որ ուկրաինական կողմը կքննարկի և կանի հնարավորը Իլյիչևսկից Հայաստան և հակառակ ուղղությամբ փոխադրվող բեռները Փոթի նավահանգստով փոխադրելու հարցին դրական լուծում տալու, սակագնային քաղաքականությունը վերանայելու, բարելավելու և երկուստեք ընդունելի դարձնելու համար:
