չորեքշաբթի, 6 հունիսի 2001
Հունիսի 6-ին տեղի ունեցավ ՀՀ կառավարության մարդասիրական օգնության կենտրոնական հանձնաժողովի հերթական նիստը, որը վարում էր հանձնաժողովի նախագահ Վ. Մովսիսյանը:
Հանձնաժողովը քննարկեց 2001-2002 թվականների ընթացքում իրականացվող 3 բարեգործական ծրագիր:
Քննարկվեց և հաստատվեց Նորվեգիայի Թագավորության արտաքին գործերի նախարարության ֆինանսավորմամբ Փախստականների հարցերով նորվեգական խորհրդի հայաստանյան մասնաճյուղի կողմից Արմավիրի մարզի Ոսկեհատ գյուղում փախստականների համար կառուցված 27 առանձնատների ջրամատակարարման ցանցի կառուցման ծրագիրը:
Մեծ Բրիտանիայի միջազգային զարգացման գործակալության կողմից Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեին տրամադրված դրամաշնորհի միջոցներով հանրապետությունում կկատարվեն քարտեզագրման աշխատանքներ: Ծրագրի նպատակը 2001 թվականի հոկտեմբերին Հայաստանի Հանրապետությունում նախատեսվող մարդահամարի անցկացման աշխատանքներին աջակցելն է:
«Ֆրանսիայի բողոքական եկեղեցու և Հայաստանի միջև համերաշխություն» ֆրանսիական բարեգործական կազմակերպության Հայաստանի մասնաճյուղը կշարունակի Հայաստանում և Լեռնային Ղարաբաղում իրականացնել իր բազմաբնույթ ծրագրերը սոցիալական և կրթական ոլորտներում:
Ծրագրի շրջանակներում Գյումրիում 200 միայնակ ծերերի համար կկազմակերպվի բարեգործական ճաշարան, օժանդակություն կցուցաբերվի Վանաձորի մանկապարտեզներին և Սպիտակի Դ.Սահակյանի անվան վարժարանին ջեռուցման կազմակերպման հարցում, ֆրանսախոսների ակումբներում կկազմակերպվեն ֆրանսերեն լեզվի և համակարգչային դասընթացներ:
Բարեգործական ծրագրերի հաստատման հետ մեկտեղ հանձնաժողովը սահմանեց դրանց շրջանակներում հարկային և մաքսային արտոնությունների շրջանակը:
Նիստում քննարկվեցին նաև առանձին բարեգործական ու հասարակական կազմակերպությունների հասցեով ուղարկված բարեգործական բեռների ներմուծման ու բաշխման, ինչպես նաև նախկինում հաստատված ծրագրերի իրականացման հետ անմիջականորեն կապված ու դրանց համար զգալի նշանակություն ունեցող գործարքների և այլ հարցեր:
