երեքշաբթի, 28 մարտի 2006
ՀՀ վարչապետ Անդրանիկ Մարգարյանի ողջույնի խոսքը վերակառուցման և զարգացման եվրոպական բանկի և Հայէկոնոմբանկի կողմից կազմակերպված առևտրի ֆինանսավորման միջազգային բանկային համաժողովի կապակցությամբ
Համաժողովի հարգարժան մասնակիցներ
Ողջունում եմ Վերակառուցման և զարգացման եվրոպական բանկի և Հայէկոնոմբանկի այս նախաձեռնությունը՝ հույսով, որ այն իր դրական ավանդը կբերի Հայաստանի Հանրապետության ֆինանսաբանկային համակարգի զարգացմանը, երկրի գործարար միջավայրի բարելավմանն ուղղված բարեփոխումներին:
Համաժողովը կարևոր է այն առումով, որ հայաստանյան գործարար հանրության և արտերկրի գործընկեր ֆինանսական կառույցների ու բանկերի մասնակցությամբ, այն նման ձևաչափով և ներկայացուցչական կազմով իրականացվող 1-ին միջոցառումն է, ունի քննարկվելիք խնդիրների լայն շրջանակ, որոնք առավելագույնս համահունչ են Հայաստանի Հանրապետությունում իրականացվող տնտեսական քաղաքականության նպատակներին:
Մեզ համար այս միջոցառումը կարևորվում է նաև մեկ այլ տեսանկյունից` առևտրի ֆինանսավորման միջազգային բանկային համաժողովը հայկական բանկի և Եվրոբանկի տարբեր ծրագրերի շրջանակներում արդյունավետ համագործակցության բնականոն շարունակությունն է : Հուսով ենք, համաժողովը ևս կնպաստի Եվրոբանկի՝ մեր երկրում իրականացվող տարբեր ծրագրերի էլ ավելի ընդլայմանը:
Արտաքին առևտրի խթանիչ դերը զարգացող, անցումային տնտեսությունների համար հաստատված է միջազգային փորձով: Ուստի նշված գործընթացին միտված ցանկացած ձեռնարկում, ինչպիսին է նաև այս համաժողովը, անկասկած, կնպաստի ոլորտում առկա խոչընդոտների և զարգացման նոր հեռանկարների բացահայտմանը, գործարար նոր կապերի հաստատմանը, բիզնեսի մրցունակության բարձրացմանը, արտահանման-ներմուծման գործընթացի խթանմանը:
Համաժողովին մաղթում եմ բեղմնավոր աշխատանք: Համոզված եմ, որ այստեղ արվելիք բոլոր առաջարկությունները և նախաձեռնությունները` ուղղված միջազգային առևտրի խթանմանը, այս ոլորտում գործող ձեռնարկությունների աջակցմանն ու երկրի գործարար միջավայրի առավել բարելավմանը, կիրագործվեն՝ էական ազդեցություն ունենալով բոլոր կողմերի համար:
