Հայաստանի Հանրապետության Կառավարություն

Այսօր տեղի է ունեցել ՀՀ կոռուպցիայի դեմ պայքարի խորհրդի նիստ, որը վարել է խորհրդի նախագահ, ՀՀ վարչապետ Անդրանիկ Մարգարյանը:

Քննարկվել են Եվրոպայի խորհրդի կոռուպցիայի դեմ պայքարի պետությունների խմբի (GRECO) Հայաստանի Հանրապետությանը ներկայացված երաշխավորությունների, ՀՀ հակակոռուպցիոն ռազմավարության և դրա իրականացման միջոցառումների ծրագրի կատարման ընթացքի, այդ ծրագրում փոփոխություններ կատարելու վերաբերյալ և այլ ընթացիկ հարցեր:

Առաջին հարցի կապակցությամբ Հակակոռուպցիոն ռազմավարության իրականացման մոնիտորինգի հանձնաժողովի նախագահ, ՀՀ նախագահի խորհրդական Բագրատ Եսայանը հաղորդել է, որ GRECO-ի կողմից Հայաստանի Հանրապետությանը ներկայացված երկու տասնյակից ավելի երաշխավորությունները բաժանվել են ՀՀ բոլոր նախարարություններին ու գերատեսչություններին և ստացված պատասխանների հիման վրա կազմվել է միջոցառումների իրականացման հստակ ժամանակացույց, որն առաջարկել է ներառել ՀՀ հակակոռուպցիոն ռազմավարության ծրագրում: Բագրատ Եսայանը հայտնել է նաև, որ Եվրոպայի խորհրդի համապատասխան առաքելությունը, վերջերս Հայաստան կատարած այցի ընթացքում, պատրաստակամություն է հայտնել համակողմանի տեխնիկական աջակցություն ցույց տալ GRECO-ի կողմից ՀՀ-ին ներկայացված երաշխավորությունների իրականացմանը:

ՀՀ հակակոռուպցիոն ռազմավարության և դրա իրականացման միջոցառումների կատարման ընթացքի վերաբերյալ, մոնիտորինգի հանձնաժողովի նախագահը տեղեկացրել է, որ 2004-2007թթ. ժամանակահատվածում ծրագրով նախատեսված 98 միջոցառումները՝ ՀՀ օրենսդրության կատարելագործման և այն միջազգային գործող չափանիշներին համապատասխանեցնելու, պետական կառավարման համակարգի, պետական գնումների համակարգի, հակակոռուպցիոն քարոզչության, դատական, բանկային, հարկային, մաքսային, առողջապահական, կրթական և այլ ոլորտներում բարեփոխումների ուղղություններով, հիմնականում կատարվել են: Այդ թվում՝ ամբողջությամբ իրականացվել է 2003թ. ընթացքում նախատեսված 9, 2004թ. ընթացքում՝ 18 միջոցառում: 2004-2005թթ. ժամանակահատվածում նախատեսված 48 միջոցառումներից կատարվել է 43-ը, 5 միջոցառում չի կատարվել, կամ կատարվել է մասնակի, 2004-2007թթ. ժամանակահատվածում նախատեսված 3 միջոցառումներն էլ կատարման ընթացքի մեջ են, իսկ 4 միջոցառում, որոնք կրում են քարոզչական կամ ուսուցողական բնույթ, իրականացվում են պարբերաբար:

ՀՀ վարչապետը հանձնարարել է ՀՀ հակակոռուպցիոն ծրագրի կատարողականն ամբողջությամբ տեղադրել կառավարության պաշտոնական ինտերնետային կայքում:

Օրակարգի հաջորդ հարցի վերաբերյալ Բագրատ Եսայանը հաղորդել է, որ ՀՀ հակակոռուպցիոն ներկայիս ծրագրի 2007 թվականին ավարտի կապակցությամբ, մոնիտորինգի հանձնաժողովում քննարկվել է վերամշակված ծրագրի նախագիծը: Խորհուրդը որոշել է այն հրապարակել զանգվածային լրատվամիջոցներով և, հաշվի առնելով 6 ամսվա ընթացքում հասարակական քննարկումների ժամանակ արված դիտողություններն ու առաջարկությունները, հանձնարարել ՀՀ նախարարություններին և գերատեսչություններին՝ մշակելու առաջիկա երեք տարիներին իրականացնելիք ՀՀ հակակոռուպցիոն նոր ծրագիր:

Հանձնարարվել է նաև խորհրդի հաջորդ նիստին ներկայացնել ամբողջական տեղեկատվություն ՀՀ պետական կառավարման համակարգի բարեփոխումների հանձնաժողովի կատարած աշխատանքների ընթացքի և արդյունքների վերաբերյալ՝ հանձնաժողովի աշխատանքի առաջիկա խնդիրներն ու անելիքները ճշգրտելու նպատակով: