ուրբաթ, 22 հունիսի 2001
Այսօր ՀՀ վարչապետ Անդրանիկ Մարգարյանն ընդունեց ՀՀ-ում Լիտվայի Հանրապետության արտակարգ և լիազոր դեսպան Զենոնաս Նամավիչիուսին: ՀՀ վարչապետը շնորհավորեց դեսպանին՝ ՀՀ նախագահին իր հավատարմագրերը հանձնելու և մեր երկրում դիվանագիտական աշխատանքն սկսելու կապակցությամբ, հույս հայտնելով, որ դա կնպաստի երկու երկրների միջև համագործակցության ընդլայնմանն ու հարաբերությունների զարգացմանը:
Անդրանիկ Մարգարյանը ցավով նշեց, որ Լիտվայի հետ մեր երկրի կապերը տակավին թույլ են զարգացած, չկա դրա համար բավարար իրավապայմանագրային հենք, սակավաթիվ են եղել տարբեր մակարդակներով երկկողմ շփումները: Ըստ ՀՀ վարչապետի, Լիտվան շատ ավելի արդյունավետ համագործակցում է մեր հարևան Ադրբեջանի և Վրաստանի հետ, ինչի մասին են վկայում երկրների միջև ապրանքաշրջանառության ծավալները և միջազգային տարբեր կառույցներում փոխգործակցությունը, մինչդեռ Հայաստանի հետ ևս համագործակցության փոխշահավետ բավականին եզրեր կան, որոնց ուղղությամբ հարկ է աշխատել:
Դեսպան Զենոնաս Նամավիչիուսը որևէ միտում չտեսնելով անդրկովկասյան հանրապետությունների հետ գործակցության մակարդակների տարբերության համար, համաձայնեց վարչապետի տեսակետին, թե միջազգային ատյաններում, նաև երկկողմ հարաբերությունների զարգացման տեսանկյունից բավականաչափ անելիք կա: Նա անհրաժեշտ համարեց երկրների տնտեսությունների, նրանց արտադրությունների, արտադրանքի պահանջարկի և առաջարկի մասին տեղեկատվության ճշգրտումը և փոխանակումը, ինչը թույլ կտա ավելի գործնական մոտեցում ցուցաբերել համագործակցությանը: Դեսպանը ընդգծված հարգանքով խոսեց Լիտվայի հայ համայնքի մասին՝ երկու երկրների միջև հարաբերությունների զարգացման համար այդ ներուժի օգտագործումը ևս կարևորելով:
Հանդիպման վերջում երկուստեք պատրաստակամություն հայտնվեց ակտիվացնելու ջանքերը Հայաստանի և Լիտվայի միջև կապերի ամրապնդման և համագործակցության զարգացման համար:
