հինգշաբթի, 28 հունիսի 2001
Այսօր տեղի ունեցավ ՀՀ կառավարության նիստ, որը վարեց վարչապետ Անդրանիկ Մարգարյանը:
Օրակարգում ներառված հարցերից կառավարությունը քննարկեց և հաստատեց «Ավելացված արժեքի հարկի զրոյական դրույքաչափով հարկվող գործարքների գծով այլ հարկային պարտավորությունների հաշվին հաշվանցման կամ վերադարձման ենթակա ԱԱՀ-ի գումարների մեծության որոշման և դրանք հիմնավորող տեղեկանքի տրման» կարգը: Դրանով կարգավորվում է հարկային մարմիններում հաշվառման կանգնած՝ ԱԱՀ վճարող համարվող իրավաբանական անձանց և անհատ ձեռնարկատերերի կողմից իրականացված ԱԱՀ-ի զրոյական դրույքաչափով հարկվող գործարքների (բացառությամբ սև և գունավոր մետաղների ջարդոնի արտահանման գործարքների, որը օրենքի պահանջն է) գծով՝ հաշվանցման կամ վերադարձման ենթակա ԱԱՀ-ի գումարների մեծության որոշման, դրանք՝ հարկ վճարող անձանց այլ հարկային պարտավորություններից հաշվանցման կամ վերադարձման ենթակա ԱԱՀ-ի գումարների վերաբերյալ հարկային մարմինների կողմից տեղեկանքի տրման կարգը:
Գործադիրը հավանություն տվեց «Տեղեկատվական տեխնոլոգիաների զարգացմանն աջակցող խորհուրդ ստեղծելու մասին» ՀՀ նախագահի հրամանագրի նախագծին: Այն, սահմանված կարգով, կներակայացվի ՀՀ նախագահին: Հրամանագրի նախագծով նախատեսվում է հաստատել խորհրդի կազմը, որտեղ ընդգրկված ինը անդամների անհատական կազմը ձևավորվում է ռոտացիոն կարգով: Ռոտացիան կատարվում է կիսամյակը մեկ անգամ՝ ՀՀ վարչապետի որոշմամբ: ՀՀ կառավարությունը մեկամսյա ժամկետում կհաստատի խորհրդի կանոնադրությունը: Խորհուրդը նախագահում է ՀՀ վարչապետը, փոխնախագահը ՀՀ նախագահի գլխավոր խորհրդականն է, քարտուղարը՝ արդյունաբերության և առևտրի նախարարի տեղակալը:
Նիստում հաստատվեց նաև Երևան քաղաքի առողջապահական համակարգի օպտիմալացման ծրագիրը: Առողջապահության նախարարությանը և Երևանի քաղաքապետին հանձնարարվեց մինչև 2001 թ. օգոստոսի 1-ը կառավարություն ներակայացնել ծրագրի իրականացման գործողությունների պլանը՝ նշելով օպտիմալացման արդյունքում խնայվող ռեսուրսները, ժամանակցույցը և անհրաժեշտ ներդրումների ծավալներն ու աղբյուրները, իսկ մինչև սեպտեմբերի 1-ը առաջարկություններ ներկայացնել ազատված տարածքների հետագա օգտագործման և (կամ) օտարման վերաբերյալ:
Կառավարությունը հաստատեց իրավաբանական անձի և անհատ ձեռնարկատիրոջ պետական գրանցման վկայականի նոր ձևերը:
Պատմության և մշակույթի հուշարձան հանդիսացող մի շարք վանքերի և եկեղեցիների նպատակային օգտագործման համար և ՀՀ քաղաքացիական օրենսգրքի 605-րդ հոդվածին համապատասխան՝ ՀՀ կառավարությունը որոշեց պետական սեփականություն հանդիսացող պատմության և մշակույթի հուշարձանները անհատույց՝ սեփականության, իսկ Տավուշի մարզի Գոշավանքը, Վայոց Ձորի մարզի Նորավանքը և սբ. Փոկասի մատուռը, Արագածոտնի մարզի Ամբերդի սբ. Աստվածածին, Գեղարքունիքի մարզի Իլիկավանքը, Տավուշի մարզի Ախթալայի սբ. Աստվածածին և Շիրակի մարզի Մարմարաշենի եկեղեցիներն անժամկետ անհատույց օգտագործման իրավունքով հանձնել Հայաստանյայց Առաքելական եկեղեցուն: Մինչ այժմ կառավարության որոշումներով 30 վանքեր և եկեղեցիներ սեփականության իրավունքով հանձնվել են Հայաստանյայց Առաքելական եկեղեցուն: Այս որոշումով հանձնվեցին ևս 150-ը՝ սեփականության, 7-ը՝ անժամկետ՝ անհատույց օգտագործման իրավունքով:
Կառավարության որոշմամբ ՀՀ 2001 թ. պետբյուջեով նախատեսված ՀՀ կառավարության պահուստային ֆոնդից 2001 թ. 3-րդ եռամսյակում քաղաքաշինության նախարարությանը հատկացվեց 17 մլն դրամ՝ Թալինի տարածաշրջանի Կաթնաղբյուրի գյուղական համայնքի վարչական տարածքում հատկացված հողամասում Մուշեղ Գալշոյանի հիշատակին նվիրված այգու հիմնադրման, կառուցապատման նախագծին և շինարարական աշխատանքաների իրականացման, Աշնակ գյուղում Գևորգ Չաուշի տուն-թանգարանի շենքի տանիքի վերակառուցման նախագծման ու շինարարական աշխատանքների իրականցման համար: Իսկ Երևանի քաղաքապետարանին՝ ներկայացված ծախսերի նախահաշվի հիման վրա հատկացվեց 6 մլն դրամ՝ Հրաչյա Ղափլանյանի անվան դրամատիկական թատրոնին տրամադրելու համար:
Կառավարության որոշմամբ «Կոնտակտ-մամուլ» ՓԲԸ-ն վերակազմակերպվեց՝ «Հայփոստ» ՓԲԸ-ին միացնելու ձևով:
Գործադրի մեկ այլ՝ «Արարատցեմենտ» ՊՓԲԸ բաժնետոմսերի մասնավորեցման նախապատրաստական աշխատանքների իրականացման մասին որոշմամբ, «Արարատցեմենտ» ՓԲԸ-ի գույքի կազմից առանձնացվեցին շահագործման հանձնված N 92 բնակելի շենքը, N 2 մանկապարտեզը, մշակույթի տունը, հանրակացարանը, կոտեջների անավարտ շինությունները, Ա և Բ բնակելի շենքերի անավարտ շինությունները և ՀՀ օրենսդրությամբ սահմանված կարգով, անհատույց հանձնվեցին Արարատի քաղաքային համայնքին: Իսկ ընկերության ջարդող-տեսակավորող տեղամասը, «Ոսկե բանալի» պրոֆիլակտորիան, Ծաղկաձորի հանգստյան տունը անհատույց հանձնվեցին ՀՀ պետական գույքի կառավարման նախարարության տնօրինությանը՝ հետագայում սահմանված կարգով, մասնավորեցնելու համար:
Նիստում որոշում կայացվեց «Աստրա» ՀՁ ՓԲԸ-ի կանոնադրական կապիտալում 50 տոկոս պետական սեփականություն հանդիսացող բաժնետոմսերը մասնավորեցնելու մասին:
Արձանագրային որոշմամբ կառավարությունը հավանություն տվեց «ՀՀ Կենտրոնական բանկի մասին» և «Բանկերի և բանկային գործունեության մասին» ՀՀ օրենքներում փոփոխություններ և լրացումներ կատարելու մասին ՀՀ օրենքների նախագծերին և «Քաղաքացիական ծառայության մասին» ՀՀ օրենքի նախագծի 39-րդ հոդվածի փոփոխությանը, որտեղ նշվում է, որ քաղաքացիական ծառայության խորհրդի անդամների պաշտոնները համարվում են քաղաքացիական պաշտոններ: Նշված օրինագծերը սահմանված կարգով կներկայացվեն ՀՀ ԱԺ:
Կառավարությունը որոշեց նաև էլեկտրաէներգիա բաշխող 4 ՊՓԲԸ-ների բաժնետոմսերի մասնավորեցման մրցույթն իրականացնել մասնակիցների նախնական որակավորմամբ և հաստատեց այդ ընկերությունների մասնավորեցման մրցույթի նախնական որակավորման և մրցույթին մասնակցելու սկզբունքները:
Տրամադրված վարկի դիմաց Լինսի հիմնադրամի հասարակ մուրհակ տրամադրելու մասին որոշմամբ ՀՀ կառավարությունը Լինսի հիմնադրամին տրամադրեց 30 մլն ԱՄՆ դոլարին համարժեք դրամ արժողությամբ հասարակ մուրհակ մինչև 2003թ.նոյեմբերի 1-ը:
