հինգշաբթի, 28 հունիսի 2001
Այսօր ՀՀ վարչապետ Անդրանիկ Մարգարյանն ընդունեց Չինաստանի Ժողովրդական Հանրապետության բարձրաստիճան զինվորական պատվիրակությանը՝ Սինցզյանյան ռազմական օկրուգի հրամանատար, գեներալ-մայոր Ցյու Յանխանի գլխավորությամբ:
ՀՀ վարչապետը ողջունելով պատվիրակության այցը մեր երկիր, նշեց, որ այն վերջին շրջանում ակտիվացող հայ-չինական բարեկամության և համագործակցության զարգացման ևս մեկ օրինակ է: Ըստ Անդրանիկ Մարգարյանի, բարեկամ երկու երկրների միջև փոխգործակցության ընդլայնման մեծ հնարավորություններ կան և տնտեսական, և գիտակրթական, մշակութային, և ռազմա-տեխնիկական ոլորտներում, ինչը մեծապես կնպաստի նաև քաղաքական հարաբերությունների զարգացմանը: Ընդգծելով համաշխարհային բազմաբևեռ քաղաքական համակարգի ստեղծման կարևորությունը, ՀՀ վարչապետը այս գործընթացում մեծ նշանակություն տվեց ՉԺՀ-ի դերին: Նա կարևորեց նաև մեր տարածաշրջանում Չինաստանի կողմից վարվող հավասարակշռված քաղաքականությունը:
ՀՀ վարչապետը շնորհակալություն հայտնեց Չինաստանի իշխանություններին և ժողովրդին՝ մեր երկրին մինչև այժմ ցուցաբերած աջակցության, բազմաթիվ օգնությունների, ինչպես նաև միջազգային տարբեր կառույցներում ակտիվ համագործակցության համար, վստահեցնելով, որ այդ ատյաններում Հայաստանը ևս, կարողությունների չափով, կշարունակի սատարել Չինաստանի Ժողովրդական Հանրապետությանը:
Անդրանիկ Մարգարյանը հայ-չինական փոխգործակցության խթանմանն ուղղված քայլ դիտարկեց նաև աշնանը նախատեսվող ՀՀ պաշտպանության նախարարի այցը Չինաստան:
ՀՀ վարչապետի հետ հանդիպմանը պրն Ցյու Յանխանը նախ իր երկրի վարչապետ Ջու Ժանցզիի ողջույնները փոխանցեց Հայաստանի վարչապետին, ապա ավելացրեց, որ իր երկիրը ևս պատրաստակամ է փոխադարձ հարգանքի և փոխշահավետության վրա հիմնված համագործակցությունն ու բարեկամությունը շարունակել և ամրապնդել: Նա ՀՀ վարչապետին ներկայացրեց Հայաստանում իր գլխավորած պատվիրակության ունեցած հանդիպումների և այցերի արդյունքները, նշելով, որ ռազմա-տեխնիկական ոլորտի փոխգործակցությանն ուղղված մի շարք հարցեր կքննարկեն ՀՀ պաշտպանության նախարարի հետ ունենալիք հանդիպման ժամանակ:
