երեքշաբթի, 3 հուլիսի 2001
Այսօր ՀՀ վարչապետ Անդրանիկ Մարգարյանի մոտ տեղի ունեցավ Զարգացման հայկական գործակալության խորհրդի նիստ, որտեղ քննարկվեցին նախորդ նիստի հանձնարարականների կատարման ընթացքը և «Աջակցություն ձեռնարկություններին» հիմնադրամի ստեղծման հարցը:
Գործակալության գործադիր տնօրեն Վահագն Մովսիսյանը տեղեկացրեց, որ նախորդ՝ հունիսի 5-ի նիստում տրված հանձնարարականների արդյունքում գործակալությունում կազմակերպվել է գործարար հանդիպում, քննարկվել են նյույորքյան համաժողովի արդյունքները, կատարվել է ինֆորմացիայի փոխանակում, ձեռք են բերվել մի շարք համաձայնություններ: Ըստ պրն Մովսիսյանի, մոտ 4 տասնյակ առաջարկներ են ստացվել, որոնք այժմ քննարկվում են գործակալությունում:
Ըստ հանձնարարականի, ԶՀԳ-ն մշակել է նաև գործարար համաժողովների կազմակերպման մոդելային ծրագիր, որը կբարձրացնի այդօրինակ համաժողովների նախապատրաստման, անցկացման արդյունավետությունը և կօգնի համակարգված ու նապատակաուղղված աշխատանքի շնորհիվ որոշակի արդյունք ստանալ: Խորհրդի անդամներին երեք օր ժամանակ տրվեց՝ ծրագրի վերաբերյալ իրենց առաջարկներն ու դիտողությունները ներկայացնելու համար:
«Աջակցություն ձեռնարկություններին» հիմնադրամի կանոնադրության վերաբերյալ խորհրդի անդամներից ստացվել են առաջարկություններ, որոնք հաշվի են առնվել: ԶՀԳ-ի խորհուրդն այսօր այն հաստատեց:
