շաբաթ, 7 հուլիսի 2001
Այսօր ՀՀ վարչապետ Անդրանիկ Մարգարյանը տրանսպորտի և կապի, պետական եկամուտների նախարարությունների և կառավարությանն առընթեր մաքսային պետական կոմիտեի աշխատակիցներին տեղեկացրեց կառավարության կադրային և կառուցվածքային փոփոխությունների մասին ու նրանց ներկայացրեց իրենց նոր ղեկավարներին՝ տրանսպրոտի և կապի նախարար Անդրանիկ Մանուկյանին, պետեկամուտների նախարար Երվանդ Զախարյանին և մաքսային պետական կոմիտեի նախագահ Արմեն Ավետիսյանին:
Վարչապետը հաջողություն մաղթեց նրանց իրենց պատասխանատու աշխատանքում՝ հույս հայտնելով, որ ձեռք բերվածը պահպանելով, աշխատակիցների աջակցությամբ կկարողանան պատվով կատարել իրենց առջև դրված խնդիրները, քանի որ այդ ոլորտները երկրի տնտեսության համար առանցքային նշանակություն ունեն: Ըստ Անդրանիկ Մարգարյանի, պետական բյուջեով սահմանված պարտավորությունների կատարումը չպետք է ինքնանպատակ լինի, այլ աշխատանքի հիմքում պետք է ընկած լինի նաև գործարարության զարգացման համար նպաստավոր պայմանների ստեղծումը:
Նորանշանակ ղեկավարները շնորհակալություն հայտնեցին ՀՀ նախագահին և վարչապետին վստահության համար, նշեցին, որ լավ են պատկերացնում և՛ երկրի տնտեսության, և՛ իրենց վստահված ոլորտների վիճակն ու հավաստիացրին, որ համագործակցված կաշխատեն դրական տեղաշարժ և առաջընթաց ապահովելու ուղղությամբ:
