երեքշաբթի, 4 հուլիսի 2006
ՀՀ վարչապետ Անդրանիկ Մարգարյանի շնորհավորական ուղերձը ՀՀ Սահմանադրության օրվա առթիվ
Սիրելի հայրենակիցներ,
Շնորհավորում եմ ձեզ Սահմանադրության օրվա առթիվ: Յուրաքանչյուր պետության և ժողովրդի համար անգնահատելի է Սահմանադրության պատմական նշանակությունն ու կարևորությունը: Այս գիտակցմամբ, անկախության հռչակումից հետո սկիզբ դրվեց մեր երկրի Սահմանադրության նախագծի մշակման գործընթացին, և արդեն 1995թ. համաժողովրդական հանրաքվեի արդյունքում ընդունվեց կարևորագույն այդ փաստաթուղթը` հիմք ընդունելով Հայաստանի Անկախության մասին հռչակագրում հաստատագրված Հայոց պետականության հիմնարար սկզբունքներն ու համազգային նպատակները:
Անցած ավելի քան մեկ տասնամյակի ընթացքում կատարելով իր գլխավոր դերն ու առաքելությունը` մեր երկրի հիմնական օրենքը, անկասկած, նպաստել է նորանկախ Հայաստանի Հանրապետության հռչակած հիմնական սկզբունքների կենսագործմանը, երկրի համար դժվարին ժամանակներում ցույց տվել կայունության, օրինականության գրավականը լինելու իր ներուժն ու կենսունակությունը:
Պետության զարգացմանը և ժամանակի նոր պահանջներին համընթաց անցյալ տարի կյանքի կոչված սահմանադրական բարեփոխումները ենթադրում են ՀՀ օրենսդրության մեջ ևս զգալի և արմատական բարեփոխումներ, և այդ ուղղությամբ արդեն ակտիվ աշխատանք է իրականացվում ինչպես օրենսդիր, այնպես էլ գործադիր իշխանությունների կողմից:
Վստահ եմ, որ ՀՀ Սահմանադրությունը այսուհետ ևս կլինի մեր երկրի առաջընթացի, անկախ պետականության ամրապնդման գլխավոր երաշխիքը:
