հինգշաբթի, 6 հուլիսի 2006
ՀՀ վարչապետ Անդրանիկ Մարգարյանը հուլիսի 7-ին եռօրյա աշխատանքային այցով կմեկնի Վրաստան՝ Աջարիայի մայրաքաղաք Բաթումիում կայանալիք Տնտեսական համագործակցության հարցերով հայ-վրացական միջկառավարական հանձնաժողովի 5-րդ նիստին մասնակցելու նպատակով:
ՀՀ վարչապետի գլխավորած կառավարական պատվիրակության կազմում են ՀՀ ֆինանսների և էկոնոմիկայի նախարար Վարդան Խաչատրյանը, ՀՀ արտաքին գործերի նախարարի տեղակալ Գեղամ Ղարիբջանյանը, ՀՀ կառավարությանն առընթեր մաքսային պետական կոմիտեի նախագահ Արմեն Ավետիսյանը, ՀՀ էներգետիկայի նախարարի տեղակալ Արեգ Գալստյանը, ՀՀ վարչապետի խորհրդական Ստեփան Մարգարյանը, «Հայկական երկաթուղի» ՓԲԸ-ի գործադիր տնօրեն Արարատ Խրիմյանը, կառավարության և ԱԳՆ-ի աշխատակազմերի վարչությունների պետեր, պաշտոնական այլ անձինք: Վարչապետին ուղեկցում են նաև ԱԺ պատգամավորներ, գործարարներ:
Այցի ընթացքում նախատեսվում է Անդրանիկ Մարգարյանի առանձնազրույցը գործընկերոջ՝ Վրաստանի վարչապետ Զուրաբ Նողաիդելիի հետ:
Տնտեսական հարցերով հայ-վրացական համագործակցության միջկառավարական հանձնաժողովի նիստում կքննարկվեն նախորդ նիստի որոշումների կատարման ընթացքը, երկկողմ տնտեսական համագործակցության ներկա վիճակին ու զարգացման հեռանկարային ուղղություններին, այդ թվում՝ գյուղատնտեսության, էներգետիկայի, բնապահպանության, առողջապահության, մաքսային, տրանսպորտի և կապի, մշակույթի, կրթության, զբոսաշրջության և այլ ոլորտներում փոխգործակցությանն առնչվող հարցեր: Նիստին կհաջորդի Հայաստանի ու Վրաստանի վարչապետների համատեղ մամուլի ասուլիսը:
Աշխատանքային այցի շրջանակներում ՀՀ վարչապետ Անդրանիկ Մարգարյանը և նրա գլխավորած կառավարական պատվիրակությունը կայցելեն նաև Բաթումի մի շարք ձեռնարկություններ, առևտրածովային նավահանգիստ:
ՀՀ վարչապետի գլխավորած կառավարական պատվիրակությունը Երևան կվերադառնա երկուշաբթի՝ հուլիսի 10-ին:
