չորեքշաբթի, 12 հուլիսի 2006
Այսօր ՀՀ տարածքային կառավարման նախարար Հովիկ Աբրահամյանի մոտ տեղի է ունեցել խորհրդակցություն՝ «Սևան» ազգային պարկի և դրա հարակից տարածքներում քաղաքաշինական գործունեության և հողօգտագործման խնդիրների վերաբերյալ: Խորհրդակցությանը մասնակցել են ՀՀ վարչապետի խորհրդական Գ. Մարտիրոսյանը, ՀՀ բնապահպանության, քաղաքաշինության նախարարները, ՀՀ կառավարությանն առընթեր անշարժ գույքի կադաստրի պետական կոմիտեի նախագահը, Գեղարքունիքի մարզպետը, Սևանի, Մարտունու, Վարդենիսի քաղաքապետերը և խնդրին առնչվող այլ պաշտոնատար անձինք:
Զեկուցվել է, որ «Սևան» ազգային պարկի և դրա հարակից տարածքներում վերջին ամիսներին քաղաքաշինական գործունեության և հողօգտագործման ապօրինի գործողությունների, միջավայրի ճարտարապետական տեսքի աղավաղման անթույլատրելիության, իրավասու պետական մարմինների վարչարարության թողտվության, չհամակարգված աշխատանքների մասին:
Նշվել է, որ 2006թ. հունիսի 28-ի ՀՀ նախագահի հանձնարարությամբ ստեղծված միջգերատեսչական հանձնաժողովի ուսումնասիրության արդյունքում միայն Վարսեր, Սևան, Ծովագյուղ համայնքների վարչական տարածքներում, Երևան-Սևան ավտոմայրուղու հարակից գոտում հաշվառված 77 օբյեկտներից շինարարության կամ տեղադրման թույլտվություն չեն ունեցել 43-ը, 32-ը տեղադրված են 1908մ նիշից ցածր: Արդյունքում՝ ապամոնտաժվել են 36 տաղավար և վագոն-տնակներ: Սակայն իրավիճակը դեռևս մնում է անբավարար, ավելանում են անօրինական կապիտալ շինարարության կամ խախտումներով կատարվող կառույցների ծավալները:
Տարածաշրջանում և Սևանա լճի ավազանում տնտեսության զարգացման և ներդրումների խթանման ուղղությամբ պետության կողմից տարվող քաղաքականության շրջանակներում նման մոտեցումները խորհրդակցության ժամանակ գնահատվել են անբավարար և անհանդուրժելի:
Համապատասխան հանձնարարություններ են տրվել իրավասու պետական մարմիններին` օրենսդրությամբ սահմանված կարգով, ըստ իրավասության հստակեցնելու խնդիրները, միջոցառումներ մշակելու և իրականացնելու ուղղությամբ:
