ուրբաթ, 20 հուլիսի 2001
Այսօր ՀՀ վարչապետ Անդրանիկ Մարգարյանն ընդունեց ՌԴ փոխվարչապետ, տնտեսական համագործակցության հարցերով ռուս-հայկական միջկառավարական հանձնաժողովի նախագահ Իլյա Կլեբանովին և նրա գլխավորած պատվիրակությանը: Վարչապետը նշեց, որ տեղյակ է պատվիրակության հանդիպումների, այցերի արդյունքներին և կարծում է, որ տնտեսական համագործակցության մակարդակը ևս իդեալականին մոտեցնելու համար բավականին նախադրյալներ երկուստեք ստեղծվել են, մնում է գործնական ակտիվ աշխատանքով և հետևողականությամբ շոշափելի արդյունքի հասնել:
Անդրանիկ Մարգարյանն իր երախտագիտությունը հայտնեց ռուսական կողմին՝ երկու պետությունների և ժողովուրդների դարավոր բարեկամության և փոխգործակցության ամրապնդման ուղղությամբ ջանքերի գործադրման համար: Նա վստահեցրեց, որ Հայաստանը ևս ամեն ինչ կանի ընդլայնելու ու զարգացնելու համար համագործակցությունը՝ հնարավորինս ինտեգրացնելով տնտեսությունները և պահպանելով քաղաքական սերտ հարաբերությունները:
ՌԴ փոխվարչապետ Իլյա Կլեբանովը պատվիրակության աշխատանքի արդյունքները գոհացուցիչ գնահատելով՝ նշեց, որ կարևորը փոխգործակցության բարենպաստ դաշտի ստեղծումն է, ինչն առաջին հերթին գործարարներին հնարավորություն կտա շուկայում ակտիվորեն աշխատել: Ըստ նրա, Հայաստանի հետ տնտեսական համագործակցության լայն եզրեր կան, որոնք ներառում են ամենատարբեր ոլորտներ՝ մշակույթից մինչև արդյունաբերություն, ենթակառուցվածքների զարգացում և այլն:
ՌԴ փոխվարչապետն ընդգծեց, որ կան լուրջ նախագծեր, որոնք նույնքան լուրջ ներդրումներ են պահանջում, դրանք իրականացնելու համար կձևավորվեն առանձին աշխատանքային խմբեր՝ որոնք կգործեն ըստ որոշակի ուղղությունների:
Հայաստանի էլեկտրական բաշխիչ ցանցերի մասնավորեցման մրցույթին ռուսական կողմի մասնակցությունը, ըստ պրն Կլեբանովի, անպայման կլինի:
Այս հարցի հետ կապված, ՀՀ վարչապետ Ա.Մարգարյանը ևս կարևորեց ռուսական կապիտալի մասնակցությունը Հայաստանի տնտեսության մեջ և նշեց, որ մրցույթի համար սահմանափակումներ չկան, ավելին, գնորդների համար պայմանները հնարավորինս բարելավվել են:
Ամփոփելով հանդիպումը, ՀՀ վարչապետը կարևորեց ստորագրվելիք արձանագրությամբ ամրագրված պայմանավորվածությունների և պարտավորությունների կատարման նկատմամբ պատասխանատվությունը և հետևողականությունը: Այս դեպքում միայն, ըստ նրա, մինչև տարեվերջ դրանց իրագործումից կարելի է որոշակի արդյունք ակնկալել:
ՀՀ վարչապետ Անդրանիկ Մարգարյանի հետ հանդիպումից հետո տնտեսական համագործակցության հարցերով ռուս-հայկական միջկառավարական հանձնաժողովի համանախագահներ Իլյա Կլեբանովը և Սերժ Սարգսյանը ստորագրեցին հանդիպման մասին արձանագրություն, որում նշված են քննարկված հարցերի շրջանակը և ձեռք բերված պայմանավորվածությունները: Այդ արարողությունից հետո, համանախագահները լրագրողների հետ հանդիպման ժամանակ ամփոփեցին համատեղ աշխատանքի արդյունքները:
