ուրբաթ, 28 հուլիսի 2006
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր- Սիմոնյանը:
Հանձնաժողովը քննարկել է 12 բարեգործական ծրագիր: Մասնավորապես, քննարկվել և հաստատվել են «Գիտության և առաջատար տեխնոլոգիաների ազգային հիմնադրամի կողմից իրականացվող «2006-2008թթ. ընթացքում ՀՀ գիտական ենթակառույցների աջակցություն» ծրագիրը, իսկ «Սինոփսիս Ֆոր Արմենիա» բարեգործական հիմնադրամի կողմից 2006-2008թթ. իրականացվող «Գիտակրթական ծրագրերի իրականացում» ծրագրի նպատակն է ՀՀ ԲՈՒՀ-ում և դպրոցներում վերանորոգել ուսումնական լսարանները, տրամադրել սարքավորումներ, ստեղծել գիտակրթական կենտրոններ:
«Բժշկական օգնություն և զարգացում» ֆրանսիական միջազգային համերաշխության հասարակական կազմակերպության կողմից, ներկայացված ծրագրի համաձայն, կիրականացվի Գավառի հիվանդանոցի վիրաբուժական բաժանմունքի վերանորոգման աշխատանքները:
Հաստատվել են «Հայ ավետարանչական ընկերակցության» Հայաստանի մասնաճյուղին կից Իջևան քաղաքի բարեսիրական կենտրոնի շենքի տանիքի վերանորոգում», ինչպես նաև «Արշավիր և Պայծառ Աբրահամյաններ» բարեգործական հիմնադրամի կողմից իրականացվող ծրագրերը:
Քննարկվել են նաև «Հայաստան» համահայկական հիմնադրամի կողմից իրականացվող «Երևանի «Հատուկ տիպի մանկատուն» ՊՈԱԿ-ի համար գույքի պատրաստման, գնման, տեղափոխման և անհատույց տեղադրման, ԼՂՀ Մարտակերտի շրջանի Վերին Հոռաթաղ գյուղի նոր կառուցվող դպրոցի ուսումնական մասնաշենքի կաթսայատան նախագծանախահաշվային աշխատանքների իրականացման, «Հեռուստամարաթոն 2006»-ի քարոզչական աշխատանքների համար 20 տեսաֆիլմերի և 40 ինտերնետային կայքերի հոդվածների պատրաստման և ԼՂՀ «Հյուսիս-հարավ» ավտոմայրուղու շինարարության համար բիտումի ներկրման ծրագրերը:
Հանձնաժողովի անդամները հաստատել են ամերիկահայ բժշկական խնամքի բարեսիրական ընկերակցության կողմից իրականացվող «Դիլիջանի հակատուբերկուլյոզային առողջարանի գազամատակարարման միջին ճնշման գազատարի կառուցում» և փախստականների հարցերով նորվեգական խորհրդի Հայաստանի մասնաճյուղի կողմից իրականացվող «Հայաստանի Հանրապետությունում փախստականների և ներքին տեղահանվածների կենսական պայմանների բարելավում, «ԿԱԶԱ» շվեյցարական մարդասիրական հիմնադրամի կողմից իրականացվող «Հայաստանի Հանրապետության Շիրակի մարզի «Ախուրյանի Նիկոլ Աղբալյանի անվան վարժարան» ՊՈԱԿ-ի վերակառուցում» ծրագրերը ևս:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
