երկուշաբթի, 14 օգոստոսի 2006
Այսօր կառավարությունում տեղի է ունեցել Լոռու և Շիրակի մարզերի գյուղական բնակավայրերում 1988թ. երկրաշարժի հետևանքով անօթևան մնացած և Ադրբեջանից բռնագաղթված փախստական ընտանիքների բնակարանային ապահովության հանձնաժողովի նիստ, որը վարել է հանձնաժողովի նախագահ, ՀՀ տարածքային կառավարման նախարար Հովիկ Աբրահամյանը:
Հանձնաժողովը քննարկել է ՀՀ 2006թ. պետական բյուջեի միջոցների հաշվին Երևանի Մոլդովական 71/1 հասցեի հանրակացարանում բնակվող 20 փախստական ընտանիքների, Գյումրի քաղաքում 1988թ. երկրաշարժի հետևանքով անօթևան մնացած ընտանիքների և Կոտայքի մարզում 1988-1992թթ. Ադրբեջանից բռնագաղթված անձանց առաջնահերթ բնակարանային ապահովության ծրագրերի իրականացման աշխատանքների, ինչպես նաև Լոռու և Շիրակի մարզերի գյուղական բնակավայրերում անօթևան ընտանիքների կիսակառույց տների շինարարության ընթացքի վերաբերյալ ՀՀ քաղաքաշինության նախարարի և համապատասխան մարզպետների ներկայացրած տեղեկատվությունը: Նշվել է, որ 2006թ. պետական բյուջեով նախատեսված 2 մլրդ 225 մլն դրամի շրջանակներում, մասնավորապես Լոռու մարզում, իրականացվում են 101, իսկ Շիրակի մարզում՝ 34 կիսակառույց տան շինարարական աշխատանքներ: Փախստական ընտանիքների համար՝ բնակարանների գնման վկայագրի ծրագրի իրականացման նպատակով հատկացված 875 մլն դրամից 775 մլն-ը տրամադրվել է Կոտայքի մարզի, իսկ 100 մլն-ը՝ Երևանի Մոլդովական 71/1 շենքի 20 ընտանիքներին: Բնակարանների գնման վկայագրի ծրագրով Գյումրի քաղաքի երկրաշարժի հետևանքով անօթևան մնացած ընտանիքների բնակարանային ապահովման համար հատկացվել է 875 մլն դրամ:
Հանձնաժողովն, ընդհանուր առմամբ, բավարար է գնահատել կատարվող աշխատանքների ընթացքը, միաժամանակ, որոշակի հանձնարարականներ են տրվել շահագրգիռ պետական մարմիններին՝ քննարկված խնդիրներն առավել հստակեցնելու և իրականացվող գործընթացը հնարավորինս արագացնելու համար:
