հինգշաբթի, 2 օգոստոսի 2001
Այսօր ՀՀ վարչապետ Անդրանիկ Մարգարյանն ընդունեց Ամերիկայի հայկական համագումարի երևանյան գրասենյակի հրավերով օգոստոսի 2-5-ը Երևանում գտնվող ԱՄՆ Կալիֆոռնիայի նահանգի պաշտոնական պատվիրակությանը՝ նահանգային խորհրդի անդամ Ջոզեֆ Սիմիթյանի գլխավորությամբ:
ՀՀ վարչապետը ողջունեց պատվիրակության այցը մեր երկիր, որի նպատակն է Հայաստանի և Կալիֆոռնիայի միջև համագործակցության զարգացմանը, առևտրատնտեսական կապերի սերտացմանը նպաստելն ու հայանպաստ հարցերին Կալիֆոռնիայի օրենսդիր մարմնի աջակցությունն ապահովելը:
Անդրանիկ Մարգարյանը բարձր գնահատեց Ամերիկայի հայկական համագումարի այս նախաձեռնությունը, նաև հայ համայնքի հետ աշխատանքը: Վարչապետը հույս հայտենց, որ Կալիֆոռնիայի նահանգի և Հայաստանի միջև առաջիկայււմ ստորագրվելիք համագործակցության հուշագիրը ևս որոշակիորեն կարագացնի փոխգործակցության գործընթացը: Նա նշեց, որ տարեվերջին նախատեսվում է հրավիրել հայ-ամերիկյան միջկառավարական հանձնաժողովի նիստ, անդրադառնալ կատարված աշխատանքների արդյունքին, առաջիկա ծրագրերին, որոնցում կարտացոլվեն նաև Կալիֆոռնիայի նահանգի հետ իրականացվելիք ծրագրերը:
Հյուրերի խնդրանքով վարչապետը համառոտ ներկայացրեց կառավարության գործունեության ընդհանուր քաղաքականությունը, իրագործվող ծրագրերը և պատասխանեց նրանց հետաքրքրող հարցերին:
Կառավարության ղեկավարի մոտ հյուրընկալված Կալիֆոռնայի նահանգի պաշտոնական պատվիրակության անդամները պատմեցին իրենց երևանյան հանդիպումների և առաջիկա ծրագրերի մասին: