երեքշաբթի, 11 սեպտեմբերի 2001
Այսօր ՀՀ վարչապետ Անդրանիկ Մարգարյանի մոտ տեղի է ունեցել Գարեգին Նժդեհի 115-ամյակի պետական հոբելյանական հանձնաժողովի աշխատանքների ընթացիկ ամփոփում:
Պետական հանձնաժողովի նախագահ Մանուկ Թոփուզյանը տեղեկացրել է, որ մինչ այժմ կետ առ կետ իրականացվել են ծրագրով նախատեսված բոլոր միջոցառումները, լուծվել է հանձնաժողովի առջև դրված՝ նժդեհյան գաղափարների տարածման և ամրապնդման խնդիրը: Նշվել է նաև, որ պետական միջոցառումների շրջանակներում կազմակերպվել են Նժդեհին նվիրված համահայկական գիտաժողով, հանդիսավոր նիստ, Լեռնահայաստանի 80-ամյակին նվիրված տոնախմբություն և հուշաքարի տեղադրում, հրատարակվել է Նժդեհի հատընտիրը, Մեղրու գունդը անվանվել է մեծ հայորդու անվամբ: Օրակարգում են մի շարք միջոցառումներ՝ հոկտեմբեր-նոյեմբեր ամիսներին հանրապետության բուհերում պետական-թեմատիկ ֆինանսավորմամբ ուսումնասիրություններ կկատարվեն Նժդեհի եռահատորը հրատարակելու ուղղությամբ, ընթացքի մեջ են հուշամեդալի և հուշադրամի թողարկման աշխատանքները: Որոշակի աշխատանքներ են տարվում վարչապետին կից կանանց և երիտասարդության խորհուրդներում նժդեհյան տարին առավել ընդգրկուն դարձնելու ուղղությամբ: Այս առումով վարչապետը կարևորել է աշխատանքները միասնական և փոխգործակցված կատարելու խնդիրը:
Հանձնաժողովի անդամների կողմից առաջ է քաշվել Նժդեհի հատընտիրի վերահրատարակման անհրաժեշտությունը, որպեսզի հանրապետության բոլոր դպրոցներն ու զորամասերը այդ գրքից գոնե մեկ օրինակ ունենան:
Վարչապետն ընդառաջ գնալով խնդրանքին՝ պատրաստակամություն է հայտնել աջակցել ևս 1500 օրինակի տպագրմանը՝ միաժամանակ հանձնարարելով արագացնել հատընտիրի ռուսերեն թարգմանության աշխատանքները, որպեսզի մինչև տարեվերջ այն ևս դրված լինի ընթերցողի սեղանին:
