երկուշաբթի, 25 դեկտեմբերի 2006
ՀՀ վարչապետ Անդրանիկ Մարգարյանի գլխավորած կառավարական պատվիրակությունը դեկտեմբերի 24-ին մասնակցել է Թուրքմենստանի նախագահ Սափարմուրատ Նիյազովի հուղարկավորության արարողությանը.
«Հայաստանի Հանրապետության կառավարության, ողջ հայ ժողովրդի անունից մեր խորին ցավակցությունն ենք հայտնում եղբայրական թուրքմեն ժողովրդին անդառնալի կորստի՝ Թուրքմենստանի մեծ զավակ, երկրի առաջին նախագահ Սափարմուրատ Նիյազովի անժամանակ մահվան կապակցությամբ:
Դժվար է գերագնահատել Սափարմուրատ Նիյազովի դերը թուրքմենական պետականության կայացման գործում: Բոլոր թուրքմենստանցիների համար նրա վախճանը անդառնալի կորուստ է: Մեծ է նաև Սափարմուրատ Աթաևիչի դերը հայ-թուրքմենական կապերի զարգացման ու խորացման գործում:
Հայաստանում սիրում և հարգում էին Սափարմուրատ Աթաևիչին: Մեր ժողովրդի շնորհակալ հիշողության մեջ նա ընդմիշտ կմնա որպես մի մարդ և պետական գործիչ, որը հայ ժողովրդի համար օրհասական պահին անգնահատելի օգնություն ցուցաբերեց մեր հանրապետությանը, հազարավոր մեր հայրենակիցներին»,- գրել է ՀՀ կառավարության ղեկավարը՝ մահվան կապակցությամբ բացված ցավակցությունների գրքում:
