Հայաստանի Հանրապետության Կառավարություն

Վախճանվեց ականավոր պետական-քաղաքական գործիչ Ալեքսան Մաթևոսի Կիրակոսյանը: Նրա ամբողջ կյանքն ու գործունեությունը սերտորն կապված էին մեր երկրի զարգացման, պետականության ամրապնդման, ժողովրդական տնտեսության տարբեր ոլորտների կայացման, մշակույթի զարգացման, շինարարության, գյուղի սոցիալական բազմաբնույթ հարցերի լուծման հետ:

Ալեքսան Կիրակոսյանը անուրանալի ծառայություններ ունի մեր երկրի հողային և ջրային ռեսուրսների արդյունավետ օգտագործման, պատմամշակութային հուշարձանների վերականգնման ու զարգացման, բնապահպանական և ամենատարբեր այլ խնդիրների լուծման գործում:

Ալեքսան Կիրակոսյանը հողապաշտ և հայրենասեր, յուրահատուկ քաղաքացիական կեցվածք և սկզբունքներ ունեցող անաչառ գործիչ էր՝ տոգորված Հայաստանի կենսագործունեության բոլոր ոլորտների զարգացման մտահոգությամբ: Մինչև կյանքի վերջին պահը նա չկորցրեց համոզվածությունը մեր պետականության կայացման, երկրի հզորացման, անվտանգության ապահովման, Հայաստան-Սփյուռք կապերի ամրապնդման նկատմամբ: Նա հավատում էր, որ հայ ժողվուրդն իրեն յուրահատուկ աշխատասիրությամբ ու իմաստությամբ կհաղթահարի բոլոր դժվարությունները և Հայաստանը կդառնա զարգացած ու ծաղկուն երկիր:

Ալեքսան Կիրակոսյանը բազմակողմանի զարգացած մարդ էր, քաջատեղյակ՝ իր ժողովրդի բազմադարյան մշակույթին և պատմությանը: Նա հիանալի հայր էր, հաստատուն և նվիրված ընկեր:

Ալեքսան Կիրակոսյանը ծնվել է 1918թ. օգոստոսի 18-ին, Ախուրյանի շրջանի Այգաբաց գյուղում, գյուղացու ընտանիքում:

1936թ. ավարտել է Լենինականի մանկավարժական ուսումնարանը, 1952-ին՝ Երևանի հեռակա մանկավարժական ինստիտուտի բանասիրական ֆակուլտետը:

1941-1945թթ. մասնակցել է Հայրենական պատերազմին՝ ղեկավարելով տարբեր զինվորական ստորաբաժանումներ:

1946-1952թթ. Հայաստանի Հանրապետությունում զբաղեցրել է մի շարք կուսակցական ու պետական պաշտոններ:

1952-1956թթ. Ա.Կիրակոսյանը ՀԿԿ Ղուկասյանի շրջկոմի առաջին քարտուղարն էր, իսկ 1958-1961թթ.՝ Հոկտեմբերյանի շրջկոմի առաջին քարտուղարը:

1961-1965թթ. տարբեր պաշտոններ է վարել ՀԿԿ կենտկոմում:

1965-1970թթ. զբաղեցրել է Հայկական ԽՍՀ կաթի և մսի արդյունաբերության մինիստրի պաշտոնը:

1970-1986թթ. եղել է ՀԽՍՀ մինիստրների խորհրդի նախագահի տեղակալ, այնուհետև՝ առաջին տեղակալ:

1986-1988թթ. ՀԽՍՀ մինիստրների խորհրդին կից պատմության և մշակույթի հուշարձանների պահպանության գլխավոր վարչության պետն էր:

1986-ից միութենական նշանակության անհատական թոշակառու էր:

Պարգևատրվել է բազմաթիվ շքանշաններով ու մեդալներով:

Ա. Կիրակոսյանը Երևանի պատվավոր քաղաքացի էր:

Անվանի պետական-քաղաքական գործչի մեծ հայրենասերի ու քաղաքացու՝ Ա. Կիրակոսյանի պայծառ հիշատակը մշտապես վառ կմնա նրա հարազատների, ընկերների և նրան ճանաչողների հիշողության մեջ:

Կառավարական հանձնաժողով

***

Հայ նշանավոր պետական-քաղաքական գործիչ Ալեքսան Մաթևոսի Կիրակոսյանի մահվան կապակցությամբ ՀՀ վարչապետ Անդրանիկ Մարգարյանի նախագահությամբ ստեղծված կառավարական հանձնաժողովը տեղեկացնում է, որ Ալեքսան Կիրակոսյանի քաղաքացիական հոգեհանգիստը տեղի կունենա հունվարի 10-ին, ժամը 17:00-ին, Սայաթ-Նովա 29 հասցեում:

Հունվարի 11 -ին՝ ժամը 12:00-14:00-ին Կոմիտասի անվան կամերային երաժշտության տանը տեղի կունենա վերջին հրաժեշտը պետական-քաղաքական գործչին, իսկ ժամը 14:00-ին՝ հուղարկավորության արարողությունը Երեանի քաղաքային պանթեոնում: