հինգշաբթի, 20 սեպտեմբերի 2001
Հայաստանի Հանրապետության անկախության 10-ամյակի կապակցությամբ ՀՀ վարչապետ Անդրանիկ Մարգարյանի անունով ստացվել են բազմաթիվ շնորհավորական ուղերձներ:
Իր անկեղծ և ջերմ շնորհավորանքները հղելով Անդրանիկ Մարգարյանին, Ռուսաստանի Դաշնության վարչապետ Միխայիլ Կասյանովը, մասնավորապես, նշել է, թե անցած տասնամյակը հաստատեց, որ Ռուսաստանի և Հայաստանի միջև ռազմավարական գործընկերությունը համապատասխանում է մեր երկրների եղբայր ժողովուրդների հիմնարար շահերին: ՌԴ վարչապետը համոզմունք է հայտնել, որ սեպտեմբերի 14-15-ը ՌԴ նախագահ Վլադիմիր Պուտինի պաշտոնական այցը Հայաստան նոր լիցք կհաղորդի հայ-ռուսական հարաբերությունների զարգացմանը՝ այդ թվում նաև առևտրատնտեսական ոլորտում:
Բելառուսի Հանրապետության վարչապետ Վլադիմիր Երմոշինն իր շնորհավորական ուղերձում վտասհություն է հայտնել, որ երկու երկրների միջև գոյություն ունեցող բարեկամական հարաբերություններն ու ակտիվ երկխոսությունը առաջիկայում ևս կնպաստեն մեր ժողովուրդների բազմակողմ կապերի ամրապնդմանը:
ԱՄՆ պետքարտուղար Քոլին Փաուելի շնորհավորական ուղերձում նշված է, որ անկախության առաջին 10 տարիներին Հայաստանն զգալի ձեռքբերումներ է ունեցել: Իրականացվող տնտեսական և իրավական բարեփոխումները, ըստ ԱՄն պետքարտուղարի, վկայում են, որ Հայաստանը պատրաստ է գործնական քայլեր ձեռնարկել՝ երկարաժամկետ տնտեսական զարգացում ապահովելու, ժողովրդավարությունն ամրապնդելու ուղղությամբ:
Անկախության տոնի առթիվ ՀՀ վարչապետին շնորհավորանքներ են հղել Ինդոնեզիայի Հանրապետության նախագահ Մեգավատի Սուկարնոպուտրին, Հնդկաստանի Հանրապետության վարչապետ Ատալ Բիհարի Վաջպային, Բուլղարիայի Հանրապետության վարչապետ Սիմեոն Սակսկոբուրգգոտսկին, ՀՀ-ում տարբեր երկրների դիվանագիտական ներկայացուցչությունների ղեկավարներ:
Անկախության 10-ամյակի առթիվ ՀՀ վարչապետ Անդրանիկ Մարգարյանին շնորհավորել են նաև Լեռնային Ղարաբաղի Հանրապետության վարչապետ Անուշավան Դանիելյանը, Ռուսաստանի Դաշնության «Իտեռա» ընկերությունների խմբի նախագահ Ի. Մակարովը, տարբեր երկրների ընկերությունների և գերատեսչությունների ղեկավարներ, սփյուռքահայ գործիչներ:
ՀՀ վարչապետի անունով շնորհավորանքները շարունակում են ստացվել:
