ուրբաթ, 19 հունվարի 2007
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 15 բարեգործական ծրագիր: Մասնավորապես, քննարկվել և հաստատվել են `Հայաստան» համահայկական հիմնադրամի կողմից «Երևանի «Նորք» ինֆեկցիոն հիվանդանոց» ՓԲԸ-ի վերակենդանացման բաժանմունքի կաթսայատան նախագծանախահաշվային փաստաթղթերի մշակում» և «Երևանի «Նորք» ինֆեկցիոն հիվանդանոց» ՓԲԸ-ի «Բ» մասնաշենքի հարավ-արևմտյան թևի 3-րդ, 4-րդ հարկերի և տանիքի վերանորոգման նախագծանախահաշվային փաստաթղթերի մշակում», Ամերիկայի «Հայ օգնության ֆոնդ» բարեգործական կազմակերպության Հայաստանի մասնաճյուղի կողմից իրականացվող «Գիտության և կրթության հայկական ազգային հիմնադրամ», «Մաթևոսյան կրթավճար», «Վանաձորի ծերանոցի գործունեություն», «Բարեգործական ճաշարաններ», «Երեխաների ընդունման և կողմնորոշման կենտրոն», «Վանաձորի, Գավառի և Երևանի «Զատիկ» մանկատների չափահաս դարձած սաների հետագա կրթության ապահովում» և «Մարզային բժիշկների վերապատրաստում», «Սակուրա» բարեգործական-հասարակական կազմակերպության կողմից իրականացվող «Էպիլեպսիայով հիվանդ 805 երեխաների արտագնա զննման, գործիքային հետազոտության, խորհրդատվության եվ բուժման օպտիմալացման» ծրագրերը:
Երևանի «Հ. Իսակովի անվան N132 միջնակարգ դպրոց» ՊՈԱԿ-ի կողմից իրականացվող ծրագրի նպատակն է վերանորոգել դպրոցը և նպաստավոր պայմաններ ստեղծել աշակերտների համար, իսկ
«Մեծն Ներսես» բարեգործական-հասարակական կազմակերպության կողմից 2007-2009 թվականներին իրականացվող ծրագիրը նպատակ ունի կազմակերպել զոհված ազատամարտիկների անչափահաս երեխաների ամենամսյա դրամական և ապրանքային օգնություն, ինչպես նաև Երևանի Նուբարաշենի թիվ 11 հատուկ դպրոցում կատարել վերանորոգման աշխատանքներ՝ ստեղծելով այնտեղ բնակվող 130 միակողմանի և երկկողմանի որբ երեխաների համար նպաստավոր պայմաններ:
Հանձնաժողովը հաստատել է «ԿԱԶԱ» շվեյցարական մարդասիրական հիմնադրամի կողմից «Երևանի թիվ 11 հատուկ դպրոց» ՊՈԱԿ-ում իրականացվող և ՀՀ Լոռու մարզի Գոգարան համայնքին գույքի նվիրաբերության, «Առաքելություն Հայաստան» բարեգործական հասարակական կազմակերպության կողմից իրականացվող «Ջերմիկ անկյուն» խմբային տուն» ծրագրերը ևս:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
