չորեքշաբթի, 26 սեպտեմբերի 2001
Այսօր տեղի ունեցավ ՀՀ կառավարության մարդասիրական օգնության կենտրոնական հանձնաժողովի հերթական նիստը, որը վարում էր հանձնաժողովի նախագահ Վ. Մովսիսյանը:
Քննարկեցին 2 կարճաժամկետ և 2 երկարաժամկետ բարեգործական ծրագրեր:
Հանձնաժողովը հաստատեց «Դիակոնիա» բարեգործական հիմնադրամի ֆինանսավորմամբ նույն կազմակերպության կողմից իրականացվող «Հույսի ավան» ծրագիրը, որի նպատակն է ՀՀ սոցիալապես անապահով շուրջ 200 ընտանիքի համար` Երևան-Աշտարակ խճուղու մոտակայքում, կառուցել 200 առանձնատուն:
Հաստատվեց նաև ՅՈՒՆԵՍԿՕ-ի գործերով ազգային հանձնաժողովի կողմից սեփական միջոցներով իրականացվող «Պատմամշակութային հուշարձանների պետական կադաստրի տեխնիկական ապահովման» ծրագիրը:
Իր հերթական` «Աջակցություն` հիվանդանոցներին» ծրագիրը կիրականացնի ԱՄՆ-ի Վերջին օրերի սրբերի բարեգործական կորպորացիայի հայաստանյան ներկայացուցչությունը: Ծրագրի շրջանակներում Վանաձորի և Արտաշատի ծննդատների, Վարդենիսի, Սիսիանի, Գյումրու, Գավառի, Մարտունու, Աշտարակի, Արմավիրի, Իջևանի, Կապանի, Ստեփանավանի, Եղեգնաձորի, Գորիսի և Հադրութի հիվանդանոցների համար կպատրաստվեն ներքնարկներ, սավաններ և բարձի երեսներ:
ԱՄՆ-ում գործող բարեգործական կազմակերպությունների ու բարերարների միջոցներով «Հայաստանի սպորտի վետերանների ասոցիացիա» հասարակական կազմակերպության և Երևանի Նոր Նորք թաղապետարանի Աշոտ Ղուլյանի անվան մանկապատանեկան տեխնիկական ստեղծագործության կենտրոնի կողմից իրականացվող «Մարզադահլիճ հաշմանդամ ազատամարտիկների համար» ծրագիրի նպատակն է ստեղծել հատուկ կահավորված մարզադահլիճ հաշմանդամների համար:
Նիստում քննարկվեցին նաև առանձին բարեգործական ու հասարակական կազմակերպությունների հասցեով ուղարկված բարեգործական բեռների ներմուծման ու բաշխման, ինչպես նաև նախկինում հաստատված ծրագրերի իրականացման հետ անմիջականորեն կապված ու դրանց համար զգալի նշանակություն ունեցող գործարքների և այլ հարցեր:
