հինգշաբթի, 8 փետրվարի 2007
ՀՀ վարչապետ Անդրանիկ Մարգարյանն այսօր ընդունել է ՀՀ-ում Թուրքմենստանի արտակարգ և լիազոր դեսպան Խիդիր Սափարլիևին, որն ավարտում է իր դիվանագիտական առաքելությունը մեր երկրում:
Վարչապետը շնորհակալություն է հայտնել դեսպանին՝ պաշտոնավարման ընթացքում արդյունավետ գործունեության համար, որը նպաստել է երկու երկրների միջև բարեկամական հարաբերությունների զարգացմանը:
Զրույցի ընթացքում Անդրանիկ Մարգարյանն ընդգծել է հայկական կողմի շահագրգռվածությունը Թուրքմենստանի հետ առևտրատնտեսական համագործակցության խթանման գործում՝ կարևորելով հայ-թուրքմենական միջկառավարական հանձնաժողովի աշխատանքների վերսկսան հարցը: Դեսպան Խիդիր Սափարլիևը շնորհակալություն է հայտնել՝ ՀՀ կառավարության ղեկավարին իր դիվանագիտական առաքելության իրականացման ամբողջ ընթացքում համագործակցության և աջակցության համար, նշելով, որ Հայաստանում նույնպիսի վերաբերմունքի է արժանացել համապատասխան բոլոր բաձրաստիճան պաշտոնյաների հետ համագործակցության ընթացքում: Նա գոհունակությամբ է խոսել նաև միջազգային կառույցներում Հայաստանի և Թուրքմենստանի փոխշահավետ գործակցության մասին:
Հանդիպման ավարտին վարչապետը հաջողություն է մաղթել դիվանագետին նրա հետագա գործունեության մեջ՝ վստահություն հայտնելով, որ նոր նշանակվելիք դեսպանի պաշտոնավարման ընթացքում ևս երկու երկրների հարաբերությունները նույն հաջողությամբ կշարունակեն զարգանալ:
