շաբաթ, 29 սեպտեմբերի 2001
Այսօր ՀՀ վարչապետ Անդրանիկ Մարգարյանն ընդունեց ՀՀ-ում ԱՄՆ արտակարգ և լիազոր դեսպան Մայքլ Լեմոնին, որը մեր երկրում ավարտում է իր դիվանագիտական աշխատանքը:
Վարչապետը շնորհակալություն հայտնեց դեսպանին համատեղ արդյունավետ աշխատանքի և Հայաստանին հնարավորինս օգտակար լինելու ջանքերի համար: Նա ընդգծեց պրն Լեմոնի անձնական ներդրումը հայ-ամերիկյան հարաբերությունների առավել սերտացման գործում և կրկին ցավակցելով ամերիկյան պետությանն ու ժողովրդին սեպտեմբերի 11-ի իրադարձությունների կապակցությամբ, վերահաստատեց մեր երկրի պատրաստակամությունը՝ սատարելու ահաբեկչության դեմ պայքարին և դեսպանին տեղեկացրեց մեկ օր առաջ Մոսկվայում ԱՊՀ անդամ երկրների կառավարությունների ղեկավարների արած համատեղ հայտարարությանը, որով դատապարտվում է ահաբեկչությունը և մարդկության համար չարիք դարձած այդ երևույթի դեմ ուժերը համախմբելու ու միասնական պայքարելու պատրաստակամություն հայտնվում:
Անդրանիկ Մարգարյանը դեսպան Լեմոնին հրաժեշտից առաջ մաղթեց հաջողություններ հետագա աշխատանքում և առողջություն՝ հույս ունենալով, որ պրն Լեմոնն այսուհետ էլ, իբրև հայ ժողովրդի բարեկամ, իր գործունեության ընթացքում չի մոռանա Հայաստանն ու հայ ժողովրդին:
ԱՄն դեսպանը վստահեցրեց, որ այդպես էլ կլինի և նշեց, որ մեկնելուց հետո նա Հայաստանում է թողնում այնպիսի աշխատակազմ, որը սիրով և նվիրվածությամբ կշարունակի սկսված համագործակցությունն ու համատեղ կառուցողական աշխատանքը:
