չորեքշաբթի, 14 փետրվարի 2007
ՀՀ վարչապետ Անդրանիկ Մարգարյանն այսօր ընդունել է Հայաստանում Իտալիայի արտակարգ և լիազոր դեսպան Մարկո Կլեմենտեին, որն ավարտում է իր դիվանագիտական առաքելությունը մեր երկրում:
Վարչապետը շնորհակալություն է հայտնել պարոն Կլեմենտեին՝ նրա պաշտոնավարման շրջանում հայ-իտալական համագործակցության ամրապնդմանն ուղղված արդյունավետ աշխատանքի համար, ընդգծելով, որ հայ-իտալական քաղաքական և տնտեսական հարաբերություններն այդ ժամանակահատվածում բարձրացան որակական նոր մակարդակի:
Երկու պետությունների միջև հարաբերությունների զարգացման գործում կարևորելով բարձր մակարդակի փոխայցելությունների դերը, Անդրանիկ Մարգարյանն ընդգծել է, մասնավորապես, 2005թ. հունվարին ՀՀ նախագահի Իտալիա կատարած այցի ընթացքում ձեռքբերված պայմանավորվածությունների արդյունքում նույն տարվա հոկտեմբերին Երևանում «Հայ-իտալական բարեկամության օրեր» փառատոնի և գործարար համաժողովի հաջող անցկացումը:
Հանդիպման ընթացքում կողմերը նշել են, որ, ընդհանուր առմամբ, հայ-իտալական հարաբերությունները զարգացման լավ հեռանկարներ ունեն՝ ինչպես քաղաքական, այնպես էլ տնտեսական, մշակութային և այլ բնագավառներում: Վարչապետն արտահայտվել է Եվրամիության «նոր հարևանության քաղաքականության» շրջանակներում Իտալիայի կառավարության հետ որոշակի ծրագրերի մշակման և իրագործման օգտին: Նման համագործակցությունը, ըստ ՀՀ կառավարության ղեկավարի, կարող է արդյունավետ լինել հատկապես Հայաստանի գյուղական վայրերում աղքատության կրճատման, փոքր ու միջին ձեռնարկատիրության խթանման, կրթության և այլ ոլորտներում, նկատի առնելով նաև այն հանագամանքը, որ Իտալիայի տնտեսությունն ունի շատ զարգացած և ուսանելի փոքր և միջին ձեռնարկատիրության համակարգ:
Հանդիպման ավարտին վարչապետ Անդրանիկ Մարգարյանը հաջողություն է մաղթել Մարկո Կլեմենտեին՝ հետագա գործունեության մեջ, վստահություն հայտնելով, որ նոր դեսպանի պաշտոնավարման ընթացքում ևս երկու պետությունների հարաբերությունները նույն հաջողությամբ կշարունակեն զարգանալ և ՀՀ կառավարության անունից պատրաստակամություն է հայտնել հաջորդ դեսպանի հետ նույն ոգով շարունակել համագործակցությունը:
Դեսպան Կլեմենտեն շնորհակալություն է հայտնել ակտիվ փոխգործակցության համար, նշելով, որ այդ ժամանակահատվածում հայ-իտալական կապերի ամրապնդման ու զարգացման նպատակով, երկկողմ ջանքերով պարարտ հողում լավ սերմեր են ցանվել, որը, վստահաբար, առաջիկայում լավ պտուղներ կտա: Դեսպանը կարևորել է առևտրատնտեսական հարաբերությունների զարգացումը և իտալական կապիտալի ներգրավումը հայաստանյան տնտեսության մեջ՝ համոզվածություն հայտնելով, որ նոր դեսպանին կհաջողվի առկա բարենպաստ պայմաններում և ստեղծված ամուր բարեկամական հարաբերությունների հիմքի վրա այս ոլորտում ևս շոշափելի հաջողություններ արձանագրել:
