ուրբաթ, 12 հոկտեմբերի 2001
Այսօր ՀՀ վարչապետ Անդրանիկ Մարգարյանն ընդունեց Հայաստանում Հունաստանի արտակարգ և լիազոր դեսպան Պանայոտիս Զոհրաֆոսին, որը մեր երկրում ավարտում է իր եռամյա դիվանագիտական աշխատանքը:
Դեսպանը շնորհակալություն է հայտնել վարչապետին արդյունավետ համագործակցության համար, նշելով, որ մեր երկրից մեկնում է Հայաստանի և բարեկամ հայ ժողովրդի մասին լավագույն տպավորություններով. «Մեր երկրների միջև հարաբերությունները շատ ամուր են և մեծ առաջընթաց են ապրել: Մենք ունենք ընդհանուր շահեր, և Հայաստանը Հունաստանի համար եղել ու մնում է ռազմավարական գործընկեր», -ընդգծել է դեսպան Զոհրաֆոսը:
Վարչապետ Անդրանիկ Մարգարյանը Հայաստանի և Հունաստանի ներկայիս հարաբերությունների մակարդակը մեծապես պայմանավորելով երկու ժողովուրդների դարավոր բարեկամությամբ, պատմամշակութային կապերով, նաև գրեթե նմանատիպ ճակատագրով, իր հերթին վստահեցրել է, որ համագործակցությունը ժամանակավոր չէ, հարաբերությունները կառուցված են բարձր և ամուր հիմքերի վրա, որում, ըստ վարչապետի, իր ներդրումն է ունեցել նաև դեսպանը:
Պանայոտիս Զոհրաֆոսը, քաղաքականից բացի, կարևորելով նաև տնտեսական կապերի սերտացումը, նշել է, որ իր երկրի համար ներդրումներ կատարելու շարժիչ ուժն առաջին հերթին քաղաքական և տնտեսական կայուն դաշտն է, հետո միայն շահութաբերությունը: Այդ առումով նա շնորհակալություն է հայտել ՀՀ իշխանություններին՝ հավասարակշված և կառուցողական մոտեցումների համար, անդրադառնալով նաև «ԱրմենՏելի» հետ կապված խնդրին: Այս հարցում երկուստեք կարևորվել է հարցը անհարկի չքաղաքականացնելը և տնտեսական հարթության մեջ լուծումներ փնտրելը:
Հրաժեշտից առաջ դեսպանը տեղեկացրել է ՀՀ վարչապետին դիվանագիտական իր նոր աշխատանքի՝ Իսրայելում Հունաստանի դեսպան նշանակվելու մասին՝ ստանալով վարչապետ Անդրանիկ Մարգարյանի շնորհավորանքն ու բարեմաղթանքները:
