երկուշաբթի, 9 ապրիլի 2007
ՀՀ վարչապետ Սերժ Սարգսյանն այսօր ընդունել է Հայկական բարեգործական ընդհանուր միության նախագահ Պերճ Սեդրակյանին և միության Հայաստանի ներկայացուցչության տնօրեն Աշոտ Ղազարյանին: Նրանք շնորհավորել են Սերժ Սարգսյանին՝ նշանակման կապակցությամբ և մաղթել հաջողություններ, ընդգծելով, որ Հայկական բարեգործական ընդհանուր միությունը, ինչպես մինչ այժմ, այսուհետ ևս իր հնարավորությունների սահմաններում կաջակցի հայրենի կառավարությանը՝ իր շարունակական ներդրումն ունենալով Հայրենիքի ամրապնդման ու մեր ժողովրդի բարեկեցության ապահովման գործում:
Վարչապետը շնորհակալություն է հայտնել ՀԲԸՄ-ի նախագահին՝ շնորհավորանքի և աջակցության պատրաստակամության համար, անչափ կարևորելով միության գործունեությունը ինչպես Սփյուռքում, այնպես էլ Հայրենիքում: Սերժ Սարգսյանն ընդգծել է հատկապես կրթության բնագավառում Հայկական բարեգործական ընդհանուր միության շահագրգիռ աշխատանքը:
Հանդիպման ընթացքում երկուստեք կարևորվել է միության դերակատարությունը նաև Սփյուռքում հայապահպանության, Սփյուռքի համայնքների ներուժը միավորելու և Հայրենիքի հզորացմանը նպատակաուղղելու գործում:
Հայկական բարեգործական ընդհանուր միության նախագահ Պերճ Սեդրակյանը ՀՀ վարչապետին ներկայացրել է միության առաջիկա ծրագրերը, խոսել՝ Հայաստանում հաջողությամբ անցկացված Հայկական բարեգործական ընդհանուր միության 100-ամյակի միջոցառումների մասին:
Սերժ Սարգսյանը նշել է, որ Հայկական բարեգործական միության ծրագրերը համահունչ են ՀՀ կառավարության ծրագրերին, ինչն առավել արդյունավետ է դարձնում փոխգործակցությունը և ՀՀ կառավարության անունից պատրաստակամություն է հայտնել շարունակել սերտ համագործակցությունը:
