երեքշաբթի, 13 նոյեմբերի 2001
Այսօր ՀՀ վարչապետ Անդրանիկ Մարգարյանն ընդունեց Հայաստանում Գերմանիայի Դաշնային Հանրապետության արտակարգ և լիազոր դեսպան Ֆոլկեր Զայթցին, որը երկամյա պաշտոնավարությունից հետո ավարտում է դիվանագիտական աշախատանքը մեր երկրում:
Շնորհակալություն հայտնելով դեսպանին հայ-գերմանական քաղաքական ու տնտեսական հարաբերությունների զարգացման մեջ ունեցած անձնական ներդրման համար, վարչապետը հույս հայտնեց, որ նոր պաշտոնում ևս՝ զբաղվելով եվրոպական երկրների հետ հարաբերությունների խնդիրներով, նա, հնարավորության սահմաններում, ժամանակ կգտնի օժանդակելու Հայաստանում նախատեսված ծրագրերի իրագործմանը:
Ֆոլկեր Զայթցն իր երախտագիտությունը հայտնեց վարչապետին ջերմ ընդունելության և պաշտոնավարության շրջանում ցուցաբերված աջակցության համար: Ըստ դիվանագետի, անցած երկու տարիներին հայ-գերմանական հարաբերությունները դրվել են ավելի բարձր մակարդակի վրա, և այսօր խնդիրն այն պահպանելն ու զարգացնելն է: Խոսելով իրականացվող ծրագրերի մասին, դեսպանը նշեց եվրոպական տնտեսագիտական բուհի կայացման փաստը՝ կարևորելով Հայաստանի համար որակյալ մասնագտների պատրաստման խնդիրը: Ինչ վերաբերում է տնտեսական ծրագրերին, ապա, ըստ դեսպանի, դրանք հիմնականում ուղղված են եղել մանր ու միջին բիզնեսի, գործարար կապերի զարգացմանը:
Հանդիպման վերջում հաջողություններ մաղթելով Ֆոլկեր Զայթցին հետագա աշխատանքում, վարչապետ Անդրանիկ Մարգարյանը հույս հայտնեց, որ հայ-գերմանական հարաբերություններում հաստատված ավանդույթներն ու նախանշված ծրագրերը հաջողությամբ կշարունակվեն:
