երեքշաբթի, 29 մայիսի 2007
ՀՀ վարչապետ Սերժ Սարգսյանն այսօր ընդունել է «ՌԱՕ ԵԷՍ» ԲԲԸ-ի կառավարման խորհրդի նախագահ Անատոլի Չուբայսին և նրա գլխավորած պատվիրակությանը, որը Հայաստանում է գտնվում ԱՊՀ էլեկտրաէներգետիկական խորհրդի նիստին մասնակցելու նպատակով:
Հանդիպման սկզբում Անատոլի Չուբայսը նախ շնորհավորել է ՀՀ վարչապետին՝ խորհրդարանական ընտրությունների հաջող անցկացման կապակցությամբ և ՀՀ կառավարությանն ու վարչապետին մաղթել հաջողություններ: Նա Սերժ Սարգսյանին ներկայացրել է խորհրդի նիտում քննարկված հարցերի շրջանակը և գործունեության առաջնահերթությունները: Անատոլի Չուբայսը կարևորել է ԱՊՀ անդամ պետությունների ընդհանուր էլեկտրաէներգետիկակական շուկայի ձևավորման վերաբերյալ օրերս Յալթայում համագործակցության անդամ պետությունների կառավարությունների ղեկավարների ստորագրած համաձայնագիրը:
Բարձր գնահատելով էներգետիկայի բնագավառում Հայաստանի հետ համագործակցությունը, «ՌԱՕ ԵԷՍ» ԲԲԸ-ի կառավարման խորհրդի նախագահն ընդգծել է, որ իր գլխավորած ընկերությունը մշտապես զգացել է ՀՀ իշխանությունների շահագրգիռ աջակցությունը: Ա. Չուբայսը խոսել է նաև ԱՊՀ երկրների էներգահամակարգերը եվրոպական երկրների էներգահամակարգերի հետ համաժամանակյա միացման ծրագրերի մասին:
ՀՀ վարչապետը պատրաստակամություն է հայտնել այսուհետ ևս շարունակել փոխշահավետ համագործակցությունը էներգետիկայի բնագավառում, իր հերթին նշելով, որ դրական է վերաբերվում ընդհանուր էլեկտրաէներգետիկական շուկայի ձևավորմանն ու Հայաստանի ներգրավմանը միասնական էներգահամակարգում:
Զրուցակցի խնդրանքով, վարչապետը ներկայացրել է նաև ՀՀ տնտեսության վիճակը, վերջին տարիներին տարբեր ոլորտներում կառավարության գործունեության արդյունքները:
