երեքշաբթի, 13 նոյեմբերի 2001
Այսօր ՀՀ վարչապետ Անդրանիկ Մարգարյանի մոտ տեղի ունեցավ տեղեկատվական տեխնոլոգիաների զարգացմանն աջակցող խորհրդի նիստ: Օրակարգում «Տեղեկատվական տեխնոլոգիաների հիմնադրամ» հասարակական կազմակերպության նախագահ Գարեգին Չուքասզյանի՝ «Էլեկտրոնային զարգացումը և Հայաստանը» թեմայով զեկույցն էր, Հայաստանում տեղեկատվական տեխնոլոգիաների (ՏՏ) ոլորտում ստեղծված առաջին տեխնոպարկի գործունեության մասին «Վիասֆեր» տեխնոպարկի հիմնադիր Ա.Մորոյանի ելույթը պարկի գործունեության վերաբերյալ, աշախատանքային խմբերի ղեկավարների զեկուցումներն իրենց ընթացիկ աշխատանքների մասին: Նիստում քննարկվեց նաև ՀՀ պետական տեղեկատվական միասնական համակարգի ստեղծման և ներդրման ծրագիրը:
Մինչ այդ խորհրդի անդամներին ներկայացվեց նախորդ՝ հոկտեմբերի 9-ի նիստի հանձնարարականների կատարման ընթացքը: Խորհրդի քարտուղար Արմեն Գրիգորյանը տեղեկացրեց, որ տրանսպորտի և կապի նախարարությունը, ըստ հանձնարարականի, ներկայացրել է ՀՀ հեռահաղորդակցության ոլորտում գործող ծառայությունների և դրանց համապատասխան սակագների մասին տեղեկանք, սակայն այն թերի է՝ դրանում ներառված չեն հեռահաղորդակցության սակագները: Վարչապետը հանձնարարեց տրանսպորտի և կապի նախարարությանը՝ մեկշաբաթյա ժամկետում ներկայացնել այդ ծառայությունների ցանկն ու սակագները: Նիստում նշվեց, որ «ԱրմենՏելի» հետ կառավարության բանակցություններում այս հարցը ևս նախատեսվում է քննարկել:
Մեկ այլ հանձնարարական, որ տրված էր կրթության և գիտության նախարարությանը, վերբերում էր հանրակրթական դպրոցներում առկա համակարգչային ուսուցման դասարանների տեխնիկական հագեցվածության, դրանց տեղաբաշխման և ձեռքբերման ֆինանսական աղբյուրների մասին տեղեկանք ներկայացնելուն: Վարչապետը պահանջեց ավելի հստակ և մանրամասն տեղեկատվություն, որը ճշգրիտ կարտացոլի բոլոր դպրոցների պատկերը և հնարավորություն կտա դպրոցների տեխնիկական հագեցվածության ու ուսուցման հարցերը ծրագրավորված կազմակերպել:
Խորհրդի անդամներին զեկուցվեց, որ նախորդ նիստի հանձնարարականներից մեկը ևս կատարվել է. ՀՀ ստանդարտացման, սերտիֆիկացման և չափագրության վարչությունը շահագրգիռ կողմերի հետ կազմակերպել է քննարկումներ ոլորտին վերաբերող հայկական ստանդարտների և համակարգերի մշակման, դրանց ներդրման մեխանիզմների մասին: Առաջարկությունը եկող երկուշաբթի կներկայացվի ՀՀ վարչապետին: Աշխատանքների արդյունավետության բարձրացման նպատակով ընդլայնվել է այդ հարցով զբաղվող հանձնաժողովի կազմը՝ ընդգրկելով ոլորտի մասնագետների:
Ս.թ. նոյեմբերին կազմակերպվելիք «Էլետրոնային զարգացումը Հարավային Կովկասի համար» միջազգային կոնֆերանսի ժամանակ ցուցահանդեսի կազմակերպման աշխատանքները, ըստ խորհրդի՝ այդ հարցով զբաղվող աշխատանքային խմբի ղեկավար Գ.Չուքասզյանի, նյույորքյան դեպքերի պատճառով հետաձգվել է և, թերևս, կանցկացվի 2002թ. գարնանը: Խումբը մինչ այդ կաշխատի և ծրագրերի մասին կտեղեկացնի խորհրդին:
